صباح الفل بتوقيت ميد ويست امريكا ومساء الجمال بتوقيت شبرا وعلى المقيمين مش في الحتت دي مراعاة فروق التوقيت.
زمان ، من حوالي 9 شهور كدة كنت بدأت موضوع عن خواطر شمعة في بلاد الفرنجة
بس فعلا اليوم هنا مكثف جدا ، والواحد هنا بيشوف/يتعلم في يومه اللي مشفهوش ولا اتعلمه في ال 25 سنة اللي قضاها في مصر .... هنتكلم عن أمريكا واللي بيحصل فيها ، هنقول حكايات وتعليقات ، ونكتب عن شخصيات ممكن تلاقيها في الشارع ... في موقف الاتوبيس ... في الكلية ... او حتى ماشية في الشارع على رجلها في عز ما الدنيا بتنزل التلج!

وبغض النظر عن سياسات امريكا الخارجية اللي فعلا - فاشلة - ومسببة عداوات كتير و وخلت صورتها زبالة على مستوى اغلب دول العالم ، إلا اننا لو نظرنا ودققنا النظر على الدولة دي وتركيبتها ... سلبياتها وايجابيتها .. هنتعلم كتير ، واحنا فعلا فعلا محتاجين اننا نتعلم كتير حتى لو مِنْ مَنْ نسميهم " الكفرة".
خلينا نشوف الصورة/الصور الحقيقية عن البلد دي وعن الناس ... عن الشارع وعن النظام .... عن التقدم الانساني - برغم هفواته - اللي يفوق التقدم التكنولوجي الرهيب.
خلينا نركن الصورة اللي واخدنها من الاعلام بأن الامريكان حاجة من اتنين - عسكري برشاش في بلادنا العربية ... او خمرجي وامرأة عريانة .... مع ان الاتنين موجودين
مما لا شك فيه ان البلد دي تفوقت في جميع المستويات - حتى لو مكنتش لسة نمبر وان في بعض الحاجات إلا انها بتسعى انها تكون ...
..
نتكلم عن البلد اللي عندها حلم ... كل مواطن في اصغر مدينة .. واصغر بلد .. ارياف .. عنده ورشته او ارضه ... يعرفه ... اسمه الحلم الامريكي
نتكلم عن الانتماء والاعتزاز بالاصل مهما كان - اللى هتلاقيه في الحواري والزقاق الامريكية ... حتى هتلاقيه عند الهوم ليس ... اللي هتلاقيه في تعليقة علم البلد وشعارها في كل بلد وفي كل بيت ... مش بس في الماتشات !!
هنغض النظر شوية عن اللي موجود في الاعلام ونشوف الناس دول اللي بنفتكرهم - غريبوا الاطوار- بيعملوا ايه في حياتهم .

..


هنلاقي ان الناس دي بتصحى من نومها قبل الساعة 7 عشان تروح شغلها ... وناس بتصحى قبل كدة عشان تجرى او تروح الجيم عشان عارفين ان عندهم مشكلة سمنة ولازم يحلوها ... او حتى مش عندهم بس لازم يبقى مستعدين واصحاء دايما.

هنلاقي الناس دي لما بتشتغل بتشتغل بجد .... عندهم حساب العمل بالساعة ... مش بس عشان الشاعة بخمسة جنيه والحسابة بتحسب .... لأ عشان الساعة شغل ... يعني 60 دقيقة شغل ! .... مش ساعة بعمل اصطباحة وساعة الفطار وساعة بصلي الضهر وساعة بحضر نفسي عشان امشي ... زي بعض/ لو مكنش اغلب اللي بيصلح في المصالح الحكومية!

هنلاقي الناس دي برضه حتى لما تحب انها تـ have fun بتعمله بذمة .... بس بتلاقي نفس الموظف اللي بيندلق زي الجردل يوم السبت بالليل من كتر الشرب والقرف ... هو هو اللي بيساعدك وبيقدملك كل التسهيلات اللي في الدنيا عشان يمشيلك مصلحتك
مش ابقى لسة مخلص صلاة الضهر واقولك فوت علينا بكرة يا سيد!
..
هنلاقي الاتوبيس بيجي الساعة 7:03 ... يعني الساعة 7:02 هتلاقيه جاي على مرمى بصرك ... يعني 7:04 متتوقعش انك تلحقه.

هنلاقي ناس بتتصف صف واحد في حتة فيها زحمة " توماتيكي" ... مش خمسميت الف واحد بينط على الشباك او عاوز ياخد مكانك ولما تقول لحد اقف في الصف يبصلك من فوق لتحت وكأنك جاي من كوكب زأرنخ اللي لسة محدش اكتشفوه اصلا.

هنلاقي ناس لما يبقى عندها مشكلة بتقعد " بجد" وبتلاقيلها حل ... عشان لازم يبقى في حل .... مش الاصل ان الدنيا كلها مشاكل ولو مشكلة اتحلت - او شبه اتحلت - يبقى بوس ايدك شعر ودقن.

هنلاقي ناس كل حاجة عندهم بوقت وبتمن ... الشغل له وقته ... الاسرة ليها وقتها ... الشرب ليه وقته .... الجنس ليه وقته.

هنلاقي ناس ... رغم العنصرية اللي موجودة في اغلبهم ... إلا ان اتفرض عليهم انهم ميبقوش عنصرين وكل واحد لازم يعامل التاني على انه "انسان" بغض النظر عن لونه او خلفيته او فكره او ارائه او وضعه او وضعه الاجتماعي او المادي.

هنلاقي المجتمع اللي يحوي اكتر من 200 مليون نسمة مختلفين في الثقافات والطباع والعادات والتقاليد والاديان .. هنلاقيهم "مستقرين" في دولة اسمها امريكا ... بتقود عالم !!
..
- على الرغم ان الناس اللي عنصريين هنا فعلا ولاد تيييييييييت لكن بيكتموا ده في نفسهم عشان بجد لو اي حد اتثبت عليه انه عنصري في موقع عمله او في شغله او حتى في الشارع بيطلع تلاتة تيته والحكومة بتخليه يبيع هدومه في ال ebay عشان يغطي الغرامات-
..

هنلاقي برضه ناس عندها عيال بتربيها ... وناس عايشة في مية البطيخ ... وناس "فعلا" مش عارفة هو مين بيحدف الطوب على مين في فلسطين!

..

كل ده هنشوفه ... هنقراه وهنحكيه وهنعلق عليه ... كلنا ... من خلال مواقف واشخاص انا قابلتها واتعاملت معاه

هنتكلم عن البلد اللي فعلا اغلب اللي بيزروها بيبقى حابب انه يعيش فيها



من غير اهانة لحد ... ومن غير - فعلا - تعظيم من شأن امريكا ... ومن غير فكرة "ا لانبهار" بالمجتمع الغربي ... رغم ان في حاجات فعلا تستحق الانبهار!!

ومن غير تقليل من مجتماعتنا الاسلامية - المصرية- العربية ... عشان انا متأكد ان بنت مصرية مغطية نفسها برابطة حجاب شيك احسن مليون مرة من ميس ميامي اللي قاعدة على شط المحيط بتاخد حمام شمس ببكبيني قطعتين كأنهم مش موجودين!

وان ست كبيرة بتشهق ع الملوخية اللي بتطبخها لعيالها اللي جايين من المدارس/الكليات/الشغل ولجوزها ... احسن من مليون سيدة اعمال بتجيب بيبي ستينج لعيالها بيطلعوا عنيهم
وان عم الحاج اللي في الستنيات اللي بيطلع من صلاة الفجر يركب على حمارته وبيروح غيطه يزرع أكله في غيطه بالدنيا وما فيها.

من غير نظريات المؤامرة ونبرات امريكا هي الشيطان الكبير والعدو الاوحد ....
هنعرض الايجابيات والسلبيات ... ووجهة نظر " الاخر" فيما نراه نحن " سلبيات " في حين ان هو يراه ومؤمن جدا انه " ايجابيات !!
هنشوف/هنتعلم .. نحاول نبقى حيادينا ونشوف الصورة من على الجانب الغربي لشط المحيط ... هنشوف الناس اللي هناك دي ليه بتقودنا وبتقود العالم .... اكيد مش بتقودنا بالبيكيني بس يعني



تاااااابعونا تجدوا ما يسركم