|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الخميس، أبريل ٢٢، ٢٠١٠ شخصيات ... مواقف ... انظمة ... امريكية نبدأ منين يا شمعة ... منين يا شمعمع ... طيب عشان نرتب الكراكيب اللي موجودة في السلطانية ... هنتكلم عن أمريكا من خلال 3 حاجات شخصيات .... ناس فيها كانت فرصة لي اني احتك بيهم احتكاك مباشر مواقف .... قابلتها او شفتها اشياء آخري ... زي انظمة التعليم ... انظمة التنقلات ... الأكل/الشرب ... احترت جدا ابدأ بأنهي شخصية ، بجد هنا الواحد قابل شخصيات/افكار مكنش يتوقع انه هيتعامل معاهم بطريقة مباشرة وعميقة كدة .. خلينا نبدأ بـ... .. R.P R من الشخصيات - رغم بساطتها - إلا انها غيرت جوايا انا شخصيا افكار كتيرة عن الامريكان والفكرة اللي كنت واخدها قبل هنا ... على الرغم انها استنثناء .. يعني مفيش منها كتير في امريكا .. بس فعلا موجودة وده في حد ذاته بهرني هي بنت عادية جدا ... في التاسعة عشر من عمرها .... مسيحية متدينة جدا ... من اسرة محافظة ... والدها والدتها مدرسين ، مامتها مدرسة لغة انجليزية وباباها مدرس رياضة الاسرة ملتزمة دينيا .. واخلاقيا ... كل الصفات اللي في البنت تميل الى صفاتنا الشرقية/الدينية الاسلامية ... مثلا لبسها كويس جدا "كبنت امريكية" ... بتاخد بالها من لبسها، تعاملتها مع الاولاد ... الحب عندها هو بداية الزواج ... اول " بوسة" هتاخدها هتكون في يوم عرسها في الكنيسة ! ... مش بتشرب كحوليات ومش مقتنعة ان الكحوليات حلال في المسيحية .... مش بتشتغل بس كل وظيفتها هي توصيل اهلها من وإلى اشغالهم لأنهم عائلة بسيطة جدا عندهم عربية واحدة ... بيشتغلوا ليل ونهار عشان يعيشوا بالبلدي كدة حياة مستورة العائلة كلها فعلا نقدر نقول عليها عائلة " محترمة" بغض النظر عن افكارهم الـ conservatives الى حد كبير والقول بالقول يذكر ... يبقى خلينا نتكلم شوية عن افكار اغلب الامريكان اغلب الامريكان افكارهم بتميل لحاجة من اتنين conservative or liberal حسابات وافكار الاتنين ممكن تبقى معقدة نوعا ما عشان الواحد يشرحها ، واصلا انا مش فاهمها اوي يعني  بس ببساطة الليبرال ... هما الناس المنفتحين جدا .. يطالبون بالحرية المطلقة المنطلقة بدون حاجز او مانع ... ومن اهم افكارهم السيئة قبول الشواذ جنسيا ..... الكونسيرفتفز .... هما الطائفة المتدينة " نوعا ما" واغلبهم ان مكنش كلهم المسيحيين المتديين ... ومن اهم افكارهم السيئة قبول وتبرير الحرب على العراق وافغانستان ... ومنهم طبعا بوش الله يحرقه طبعا اغلب الامريكان مش pure conservative ولا pure Liberal اغلبهم بياخدوا صفات من هنا ومن هنا ... بس كلهم لهم ميول الى احد الطرفين ... وممكن جدا تميز ما بين الاتنين الخلاصة العائلة دي ... عائلة R... هي إلى حد كبير كونسفرتيف ... وعلى قد التزامهم وافكارهم القريبة جدا مننا كمسلمين ... في طريقة المعيشة والتعامل بالحسنى والاخلاص "جدا" في العمل ومساعدة الاخرين- وهما ساعدوني انا شخصيا كتير جدا - .. إلا فيه بعض الاشياء اللي الواحد لا يتفق معاها غير كدة هما اسرة مرتبطة جداااا ... مرتبطة لأبعد حد ... البنات "هما بنتين" متربين تربية محترمة جدا ... والوالدين نموذج مشرف لأي مجتمع في العمل العام او في الاخلاص في عملهم ولبلدهم ... بيعملوا خير كتير مع ناس يعرفوهم او ميعرفهمش ... متكفلين ببنت في احد بلاد امريكا اللاتينية / ومن ضمن احلام R انها تقابل البنت دي في الحقيقة ... هما كافلنها ماديا من سنين وسنين ... الاسرة كمان بتحب العمل الخيري والعمل العام عموما ، غير نشاطتهم الدينية في الكنيسة ، غير كدة عايشين حياتهم وبيقدسوا ديزني وورلد وليهم على الاقل رحلة سنوية لحاجة ليها علاقة بديزني ، وكانت مفاجأة لبنتهم الصغرى في عيد ميلادها انهم خدوها "مفاجأة" الى المطار ليفاجأوها انهم رايجين على ديزني ورلد يحتفلوا بعيد ميلادها هناك علىا لرغم ان الاسرة فعلا تعتبر " فقيرة" بالنسبة لأسر كتير امريكية .. إلا انهم بيشتغلوا ليل ونهار لكي يعيشوا حياة كريمة... رجوعا للشخصية ... هي فعلا شخصية - رغم صغر سنها - محترمة ، تحترم كونها بنت ... وظيفتها الاولى هي الاهتمام بأسرتها والاخلاص لها ... سواء كانت هذه الاسرة والديها ... او زوجها واولادها كلامنا كتير كان في الاديان ، فعلا انا انبهرتت ببعض افكارها اللي قريبة جدا من الاسلام .... ده بغض النظر عن قضية "صلب المسيح" ... وهل المسيح آله او رسول .... دي النقطة اللي فعلا في اختلاف كبير ما بينا ... غير كدة في نقاط اتفاق كتير جدا ... واتمنى فعلا ان بعض البنات اللي مهوسيين بالموضة والغرب ... والتقليد الاعمى في بلدنا ... انهم يتعلموا من البنت دي " اخلاقيا" اكتر حاجة ازعجتني في التعامل مع هذه الشخصية هي انها كانت بتفكر " جديا" انها تحولني الى المسيحية  .. على النقيض بقا الشخصية M هي بنت في العشرين من عمرها ، كانت معايا في الكلاس الترم الاول ، هي بنت روسية الاصل .. لأسرة امريكية اللي اتبنيتها .... وخلينا نتكلم شوية عن نظام التبني في امريكا على حد علمي ، امريكا من اكتر الدول اللي بتتبنى اطفال من دول تانية ، آسيا او افريقيا او روسيا ... وبغض النظر عن ان نظام التبنى حرام شرعا في الاسلام ... واحنا بنفضل نظام "الكفالة " في الاسلام ... على نظام التبنى كاملا لعدم اختلاط الانساب ... بس الامريكان مبيفرقوش مابين الاتنين ، واغلبهم بيجيبوا اطفال او شباب او بنات في سن المراهقة ويتبنوهم كاملة ، ويغيروا اساميهم وياخدوا الLast name بتاعهم وكل حاجة ونظام التبنى بيمشي لغاية سن 18 سنة ... يعني يبقى واحد هلف كدة ولسة مبتنينه حاجة كمان ، التبني هنا مش وصمة عار على " المتبنى " ... على الشخص اللي وقع عليه فعل التبنى يعني ... بالعكس ، هنا شيئ عادي ومنتشر جدا .... وعادي جدا انك تلاقي واحد يقولك ان هو ابن بالتبني لفلان او علان ... حتى الاخت M لما كنا بنتكلم في الكلاس بالمناسبة على التواريخ اللي غيرت في حياتك ، هي قالت وبكل فخر يوم ما الاسرة دي تبنوها وجابوها من روسيا لأمريكا ... ودي كانت عندها حوالي 15 سنة !! الشيئ يالشيئ يذكر ... زي ما الامريكان بيتبنوا كتير اوي وبيعاملوا اللي بيتبنوهم على انهم اولادهم "فعلا" ... هما كمان مشهورين جدا بالتبرع الـ Donation .. ده شيئ منتشر جدا وفي منظمات كبيرة ، ومحلات قائمة على نظام التبرع ده ، بيتبروعوا بهدومهم وعفشهم القديم الى محلات زي سلسلة محلات goodwill ... والمحلات دي تعمل لمنظمات خيرية ، والعائد من بيع الحاجات المستعملة دي بيبقى لاعمال خيرية نرجع للشخصية M البنت دي منفتحة جدا ... لك ان تتخيل ... روسية تعيش في امريكا ... مش هاقولك غيّر فكرتك هنا عن الامريكان والروسيات  ... انا هاقولك ثبْتها وأكدها الحياة فري جدا .... من بوي فريند لآخر ... الاغاني ال Dirty على الآي بود ... ويك إند بارتيز ... شرب ومسخرة .... غير العربية السبور - اللي خسارة فيها  - اللي اهلها اللي متبنينها جابولهالها ... ملاقيش حد يتبناني  من اغرب المواقف اللي حصلت مع الشخصية دي ، ان البوي فريند بتاعها حب يدخلني في مشكلة ما بينهم اني احلها ... ابقى وصلة خير يعني .. وبالمرة كان بيشهدني على حاجات هي عاملتها لما هما broke up طبعا مش هاقول الحاجات دي ولا التفاصيل اللي هو أصر انه يحكهالي ... عشان الرقابة  والشيئ بالشيئ يذكر لازم نتكلم عن نظام الـ " boyfriend" والـ "girlfriend" بس بعد الفاصل.... 
 |