السبت، أكتوبر ٠١، ٢٠١١

المجلس العسكري ... واشباه "الاحزاب" .. والقراطيس المقرطسة



بداية كدة احب ان اعلن ان كل اللي مضوا على هذه الورقة "الحمضانة" لا يمثلوني كمواطن مصر لا من قريب ولا من بعيد ... نيجي بقا للبيان

1- البيان لم يحدد "متى" يجب أعلان موعد انتخابات الرئاسة ... كل اللي موجود فيه انه بعد اجتماع مجلسي الشعب والشورى هيشكلوا لجنة واللجنة هتحط الدستور ... وبعد ما يتحط الدستور ويتعمل استفتاء عليه من الشعب ، والموافقة عليه ، سيتم الاعلان مباشرة عن انتخابات الرئاسة ... وبناءا على الاعلان الدستوري " تشكيل اللجنة الواضعة للدستور .... وعمل الدستور يكون في 12 شهر ! " 6 لتشكيل لجنة ! و 6 لوضع دستور ! يا حلولي ! يعني على أبريل /مايو 2013 .. هيبقى عندنا دستور لسة هيستفتى عليه ... ولو تم عمل استفتاء عليه يعني على يوليو 2013 .. ولو تم الاتفاق عليه هيبدأ الاعلان عن فتح باب الترشيح ودي أقله 3- 6 شهور ... يعني انتخابات رئاسة على آخر 2013 او اوائل 2014 ... يعني بالطعون والاعادات مش أقل من 2014 عشان يبقى عندنا رئيس .... على 2014 على ما نخلص من المجلس العسكري .... هأو !

..

2- المجلس لم يلُزم بأي شيئ .. "دراسة " وقف العمل بقانون الطوارئ .. آه هيدرسوا ايه ؟ وبعدين يطلع كارثة . اي كارثة مفتكسة اليومين اللي جايين ويقولك لأ الحالة الامنية لا تسمح برفع حالة الطوارئ .. وبيقولك " إلا في بعض الجرائم " كلللللللللله إلا دي ! أصلا اللعب كله على " إلا" دي ... أصلا قانون الطوارئ ده استثنائي واستخدامه استثنائي والاعتراض على انه استثنائي عشان اللي بيحدد الاستثناء ده هما نفسهم اللي بيضعوا الدنيا وبيستخدموه على مزاج أهلهم .. قانون الطوارئ يأما موجود او مش موجود ... من غير دراسة .. ومن غير "إلا" ااات ! بس نسيبها عايمة كدة يبقى احنا بنتقرطس .. وع العموم الشعب خلاص انهى الطوارئ ,,واللي عاجبه الطوارئ يبقى يروح يطبقه على نفسه بقا ! مفيش طوائ تاني من غير استفتاء شعبي ... قانونا ودستورا وثوريا .. بس !

..

3 - بالنسبة الـ 12 ألف اللي محكوم عليهم او لسة بيتحاكموا عسكريا ؟ هما فين ؟ واللي لسة آخرهم اتاخدوا امبارح ؟

..

4- فين حق المغتربين والعاملين في الخارج في الانتخابات ؟ الانتخابات ع الابواب ولسة مش عارفين مصيرهم !

..

5- سؤال : الوثيقة دي ملزمة للمجلس؟ بأي شكل؟ وعنان ممضاش عليها ليه كممثل للمجلس العسكري؟ ولا هي بس تبقى ملزمة " بما فيها من فروض الولاء والطاعة للمجلس العسكري " للأحزاب ... وللمجلس " هيدرس وهيشوف وهيفكر " ؟!

..

من الأخر ..... الفريق سامي عنان باع العتبة الخضرا للأحزاب ...

وسلملي على القراطيس .... يا بتاع القراطيس يا متقرطس ....... هشششششششش شيييييي !

ملحوظة : صورة البيان مقتبسة من جريدة الدستور الأصلي


Posted by Mahmoud Hafez :: السبت, أكتوبر ٠١, ٢٠١١ :: 1 Comments:

Post a Comment


Free Web Site Counters
Get a Free Web Site Counters