|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الخميس، يونيو ٢٦، ٢٠٠٨ نفسي اوقات كتير ببقى نفسي اطلع فوق اوي ... فوق كل البشر واتفرج من فوق على كل حاجة اوقات كتير ببقى نفسي امسك ميكرفون واغني اي كلام ... او أدندن بكلام من مفهوم .. اوقات كتير ببقى نفسي أسكت بالأوي ، والكل يسمع سكاتي ويقدره .. اوقات كتير ببقى نفسي اجري من الحزن وميلقنيش زي كل مرة ويكلبش فيا وافلفص منه واجري تاني وهو يجري ورايا .. اوقات كتير ببقى نفسي أكلبش في السعادة واخدها انكجيه ومسبهاش أبدا أبدا .. اوقات كتيرة ببقى نفسي اجري اوي في حتة مفهاش بشر ، اجري اجري لغاية لما اتعب واقعد وانام واصحى الاقي نفسي فوق ... فوق خالص .. للأبد ! اوقات كتير ببقى نفسي آخد شنطتي واروح بلاد معرفهاش وميعرفنوش ، مفهمهمش وميفهمونيش ... اوقات كتير ببقى نفسي الف العالم كله كله ... مش مهم البلاد المشهورة ، المهم كل امشي واشوف يمكن الاقي اللي انا مش عارفه ..! اوقات كتير ببقى نفسي احضن العالم كله .. واوقات أكتر ببقى نفسي اولع في الدنيا بكل ما فيها !! اوقات كتير ببقى نفسي اروح هناك تحت البيت اللي معرفش اوصله واقولها " وحشتيني " اوقات كتير ببقى نفسي انزل في اي محيط وحد يجيبلي سرير وسط المية اوقات كتير ببقى عاوز اطير ... واقف على كل شجرة شوية ... بس مش اي شجرة ! اوقات كتير ببقى نفسي في حضن اترمي فيه واعيط ... بس من غير ما يتكلم ولا يسألني عن اي حاجة اوقات كتير ببقى نفسي احكي عن أسرة كانت وكانت وكانت ... اوقات كتير ببقى نفسي اسيب الدنيا كلها وارجع بيتي الاقيها مستنياني ، ومحضرالي الغدا وتشيل الغبار من على كتفي ... اوقات كتير ببقى نفسي في واحدة كل حياتي انها تجيب انتريه جديد او تجيب ستارة جديدة في الصالة او تغير طقم الصيني .. او تجيب كوبايتين تلاتة بدل اللي اتكسروا ... او تشوف ضحكتي من القلب .. او تلبس حاجة في صوابعها مني انا بس ... او تشوف عيل من العيال جايب الدرجة النهائية وطالع الأول على الدنيا كلها اوقات كتيرة ببقى نفسي اشوف ماكيتات مني صغيرة بتجري قدامي وبجري وراها والعب معاها ، واضربها لما تعمل حاجة غلط او لما كان زهقان من الدنيا كلها و اعلمهم اللي ابوهم متعلمهوش غير لما اطلع عينه وعين اللي جايبينه ! اوقات كتير ببقى نفسي اكسر دماغ كل " الاغبية " اللي كل وظيفتهم في الحياة تحطيم احلام اقرب الناس ليهم اوقات كتيرة ببقى نفسي اشوف ناس واقولهم بالفم المليان " طظ فيكم " وفي عقلكم اللي فاكرينه بيفهم ده ... طظ في كل السنين اللي عشتوها دي ولسة بيضحك عليكوا او عاملين انكم بيضحك عليكم .. بمزاجكم !! اوقات كتير ببقى عاوز انسف دماغي بقنبلة ذرية !! اوقات كتير ببقى نفسي ارجع الطفل ابو ببرونة على صدره واي حد يلاعبه يضحك اوي ... من قلبه اوقات كتير ببقى نفسي في نظرة حد فاهمني اوي من غير ما اتكلم .. اوقات كتير ببقى نفسي في اسرة كاملة بكل أركانها ... اب .. ام ... اولاد ... مش مهم انا مين ... المهم اكون واحد من اسرة بجد اوقات كتير ببقى نفسي اروح هناك وامسك الباب ابو قفل واقوله ليه سبتني ده كله يا .... بابا ! اوقات كتير ببقى نفسي في ضهر استند عليه اوي ولو حتى اسما ... كان بيبقى نفسي اوي وانا صغير لما حد أكبر مني يضربني اقوله هاجيبلك اخويا الكبير ... اللي مش موجود أصلا... ولما كبرت اوقات كتيرة بيبقى نفسي امسك الموبايل واتصل بالرقم اللي يوصلني بـ "ابويا " .... اللي هو مش معايا اصلا ! اوقات كتيرة بقى نفسي انسى الـ25 سنة اللي فاتوا ... بس مبعرفش اوقات كتيرة ببقى نفسي اروحلها واقولها " ليه كدة بجد " ... ليه تخسري وتخسرينا الدنيا كلها كدة ؟! وترد عليا بحاجة متوقعهاش تخليني افوق من الغيبوبة اللي لسة عايش فيها دي ! اوقات كتيرة ببقى نفسي اطرش ... او اعمى ... عن حاجات كتيرة ندمت اوي لما شفتها او سمعتها ! اوقات كتيرة ببقى نفسي اكون محدود العقل ، ومبفهمش ، ومربطش كل حاجة ببعض ، واقات كتيرة ببقى نفسي كل توقعاتي واستنتجاتي تبقى غلط... وتبقى غلط اوي ! اوقات كتيرة ببقى نفسي اروح هناك ويتقفل عليا الباب الحديد ابو قفل للابد !! 
 الثلاثاء، يونيو ١٧، ٢٠٠٨ حلم كان فلاش . . ماما وبابا بيحبوا بعض أوي ... معتقدتش اني اشوف حد بيحب حد كدة، ولا بيعشق حد كدة ، ولا بيحس بحد كدة ماما دايما بتشوف الدنيا بعيون بابا ... وبابا بيحب الدنيا بقلب ماما وهما الاتنين مش بس بيكملوا بعض ... دول روح واحدة في جسدين الجميل انك تلاقيهم دايما وكأنهم بيحاولوا يقلدوا بعض تحس ان كل واحد قاصد انه يعمل زي التاني بالظبط ماما تشوف بابا هيختار اي من المنيو لما بنتعشى برة عشان تختار زيه وبابا دايما يحب ياكل من طبق ماما ومن نفس المعلقة حبهم كان شئ عظيم أوي ... لما تشوفهم وتعيش معاهم وتحس بالحب ده تحس كأنك قدام جبل كبير من الحب .. جبل شامخ وقوي لا يمكن يتهز أبدا جبل من الحب تفخر انك عشت جنبه وحواليه ،، الجبل ده مقدرتش تهزه لا أعتراض أهل ماما اللي كانوا ملهمش " غيرها " وكانوامش عاوزين بابا أصلا.. ومقدرتش تهزه اعتراضات أهل بابا اللي ملهومش "غيره " وكانوا مش عاوزين الطريق الصعب ووجع الدماغ ..!الجبل كان فعلا أقوى من أي ظروف ....كان أقوى من كلمة من هنا .. كان أقوى من مشاكل أقل مايقال عليها انها " تافهه" بس كتير بتكون سبب انها تهدم الحب اللي اتولد بس حب بابا وماما كان أكبر من أنه يكون طفل ضعيف .. ده اتولد طفل كبير وقوي ... اتولد جبل لا تهزه شئ جميل أوي انك تلاقي نفس الحب هو هو مهماعدى عليه الزمن ، نفس الشوق ونفس اللهفة ، جميل انك تلاقي الوش المكرمش يقول كلام غزل بسيط ورقيق عشان التجاعيد تبان وتظهر ضحكة من جوة القلب جميل انك تلاقي كلمة "وحشتيني " عجوزة أوي بس روحها شابة أوي جميل أوي انك تشوفه بيميل عليها قبل ما يفطر ويهمسلها وسط كل ولادهم " بحبك أوي " جميل أوي لما تخش فجأة تلاقيه بيغازلها في أوضه مكتبه وهي كسكرتيرة " دلوعة " .. تأبى وتريد جميل أوي انك تحس بنفس نظرة العين من شخصين لون عيونهم مختلف أصلا جميل أوي ان نفس الشوق واللهفة والحب اللي عاش طول السنين دي كلها في روح واحدة وفي قلب واحد يأبي انه ينفصل حتى لو كان السبب الموت جميل أوي .. ايوة جميل أوي انهم لما حد فيهم يضطر انه " يرحل " التاني " يحصله " في نفس السنة .. مش مهم مين الاول ومين اللي وراه .. عشان اصلا انتهت حياة التاني بمجرد نهاية حياة حياته جميل أوي بجد ان بابا و ماما يحبوا بعض كدة
cut . ، فلاش 2035 م
!
الاثنين، يونيو ٠٩، ٢٠٠٨ Lonely ربما يختلف مفهوم كلمة الوحدة من انسان الى آخر وربما أيضا لا يعلم معنى هذه الكثير والكثير .. ولكن بدون اي رتوش انا اعيش هذه الحالة بكل معانيها وبكل مفاهمها المعلومة والغير معلومة وبس
|