الأربعاء، مارس ٣٠، ٢٠١١

هو انا ليه نازل يوم الجمعة 1 ابريل ؟





هو انا ليه نازل يوم الجمعة 1 ابريل ؟

عشان دم حوالي 1000 شهيد و 6000 جريح ولسة مفيش " واحد" اتحاسب

عشان فلوسنا اللي متبعزقة في بنوك العالم ومفيش اي خطوات جادة عشان يتم تجميد حسابات الحرامية ومصادرة فلوسهم

عشان محاكمة الرئيس المخلوع ومراته واولادة مؤجلة لأجل غير مسمى

ومحاكمة عز وجرانة والمجرم حبيب العادلي لسة مؤجلة

انا نازل يوم الجمعة عشان قضية خالد سعيد اللي بقالها ما يقرب من سنة لسة مؤجلة

انا نازل يوم الجمعة عشان مش عاوز ثورتنا تبقى ثورة ذات نتائج مؤجلة !!

انا نازل يوم الجمعة عشان الحزب الوطني لازم يتحل

وعشان الأعلام اللي بندفع فلوسه من جيوبنا لازم ينضف عن بكرة ابيه

أنا نازل يوم الجمعة عشان صفوت الشريف وزكريا عزمي وفتحي سرور ماشيين يبرتعوا في البلد ويعملوا لقاءات صحفية ويتصلوا بالتليفزيون ومفيش حد قرب لهم ولا وجه لهم حتى سؤال

انا نازل يوم الجمعة عشان خايف على الثورة وحاسس انها بترجع لورا

انا نازل يوم الجمعة عشان في صورة ضبابية لمستقبل مصر والثورة كل يوم الجيش بيثبتها

انا نازل يوم الجمعة عشان حق التظاهر السلمي ده حق مكتسب لكل حر في العالم ومش ممكن نستغنى عنه

انا نازل يوم الجمعة عشان اقول لكل ظالم وكل فاسد بيحاول يهرب من افعاله بفلوسنا ودمنا .. اقوله احنا لسة متعبناش ومش هنيأس .. وزي ما بدأت بقوتنا وعزميتنا .. لازم تنتهى بانتصارنا

انا نازل يوم الجمعة عشان أحمي الثورة

انا نازل يوم الجمعة عشان ام صوتي لكل واحد بيقول " عاوزين حقنا.... فلوسنا ودمنا " وعمرنا ما هنفرط فيه


Posted by Mahmoud Hafez :: الأربعاء, مارس ٣٠, ٢٠١١ :: 0 Comments:

Post a Comment


السبت، مارس ١٩، ٢٠١١

كنتي فين يا "لأ" ... لما قلت " نعم " .... !



..


لو انت محتار ومش عارف تختار زيي .. لو انت عندك كل ساعة وكل يوم رأي مختلف .. الصبح نعم وبالليل لأ وبعد الغدا بين وبين

اتأكد انك ع الطريق الصح ... انت فرحان وبتجتهد انك تعرف الصح - من وجهة نظرك - ايه .. انت كدة عارف ان صوتك " أمانة " وهيفرق أوي ... بإيدك انت بترسم مستقبل بلدك .. ايوة انت صح

وخليك كدة محتار عشان تجتهد وتقرأ وتسمع وتشوف وجهات النظر التانية وتفنيدها وفي الأخر تكون وجهة نظرك الخاصة

بس ارجوك كوّن وجهة نظرك الخاصة بيك قبل ما تدخل اللجنة وتعمل " تشيك " على نعم او لا ...متستسهلش .. شوف جواك ولو لاقيت 51% نعم و 49% لا .. يبقى اديها نعم .. والعكس صحيح


نيجي بقا للتعديلات الدستورية ... متخافش متخافش انا مش هقرررررررررررب خااااااااااالص من التعديلات الدستورية .. فيه مليون فيديو ونوت اتكلموا واتمحصوا وانا مش هاجيب التايهه يعني ..

انا بس هتكلم من برة برة كدة ... وهقول رأيي " بس في الاخر" عشان بعديها أجري على طول .... خلي بالك رأيي مختلف مش هتلاقيه في اي نوت ولا فيديو اللي انت قابلتهم في اي حتة .. اوعدك :p


- بدون الدخول في التعديلات الدستورية المقترحة .. لازم تسأل نفسك .. انت موافق على المبدأ ولا لأ ؟

يعني موافق تعدل دستور داب وعاف عليه الزمن ولا لأ ؟

هل يصلح هذا الدستور ؟ او بعض منه لمصر بعد الثورة ؟

تفتكر الثورة قامت عشان الدستور يتعدل ؟

ايوة ايوة .. انا سامع حد بيقول ده مؤقت .. تعديل مؤقت لغاية لما نمر بالمرحلة دي عشان بس ميبقاش فيه "فراخ" دستوري .. انا أعرف الفراخ الشمورط . ايه الدستوري دي :))؟

يعني كلها كام شهر لما ننتخب انتخابات جديدة رئاسية وبرلمانية هيشكلوا لجنة جديدة تعملنا دستور جديد لانج بركتونته

والتعديل " بيلزم " انه لازم يتعمل دستور جديد في خلال 6 شهور بعد الانتخابات

ارد واقول .. حكاية المؤقت دي فستك ..وحكاية الفراغ الدستوري برضه ستك " آخر عشرميت حاجة " وعلى رأي فريد شوقي في فيلم عربي قديم معلش عملناها قبلك .. وضحكوا علينا قبل كدة وقالوا ان مبارك لازم يقعد لآخر المدة عشان الفراخ الدستوري

تبيض ولا تلد

..

وبنفس المبدأ ... مينفعش نقبل حاجة عشان بس " مؤقتا " ... بمعنى .. ان حتى الناس المؤيدة للتعديلات الدستورية رافضة بنود في التعديلات .. او رافضة بنود كتير من البنود اللي محدش قربلها ط في بنود مهمة جدا في الدستور محدش قربلها واغلب الناس عارفة ان البنود دي لو استمرت هتبقى كارثة " زي مثلا الحاجات اللي خاصة بصلاحيات الرئيس ... وبنود كتير بتخلي الدولة رئاسية " كما هو الحال في العصر البائد " ومش برلمانية

وفي بنود كمان خاصة بمجلس الشعب والشوري


..

وبرضه بغض النظر عن المواد اللي اتعدلت كافية ولا لأ ... الفكرة في المبدأ

هل فكرة التعديل مقبولة ولا لأ ؟ حتى لو مؤقتا ؟

هل تعديل الدستور ولو مؤقتا يتفق مع مبادئ الثورة اللي اولها " اسقاط النظام " بما فيه من دستور ؟!


وفي نقطة مهمة ممكن يكون ناس كتير مخدتش بالها منها " انا عن نفسي مقرتش ولا سمعت عنها حاجة " ... لو خلاص عدلنا الدستور .. وهوبا عملنا انتخابات رئاسية وبرلمانية واتشكلت لجنة لعمل دستور جديد ... والحياة بقت حلوة وعملنا دستور جديد ..


تفتكر مجلس الشعب والشورى ورئيس الجمهورية هيبقى وضعهم دستوري في مكانهم ؟ ولا هيتفك مجلس الشعب ويسقط الرئيس بعد 6 شهور واعلان الدستور الجديد ؟


بمعنى ... لو الدستور الجديد اللي اتعمل من غير نص عمال وفلاحين في مجلس الشعب .. ومجلس الشعب ده اللي انتخب بالدستور المعدل نصه عمال وفلاحين ... يبقى ايه الوضع ؟ أسقط المجلس عشان غير دستوري !

وكذلك الحال مع الرئيس .. بالتعديل مدة الرئيس 4 سنوات قابلة للتجديد مرة واحدة فقط .. في بعض القانونيين يعترضون على 4 سنوات وبيقولوا لمفروص تبقى خمسة على الاقل او ستة .. عشان مجلس الشعب مدته 5 سنوات .. يعني الراجل الرئيس القادم نبقى ماضيين معاه عقد اربع سنين وبعدين نقوله لأ خليك سنة زيادة او روّح بيتكم !

حد هييجحي يقولي لأ .. ما احنا هنعمل دستور جديد وناخد بالنا من مواصفات مجلس الشعب ومواصفات الرئيس عشان ميسقطوش باعلان الدستور الجديد .. هقوله يا سلاااام يبقى احنا هنرجع تاني للترزية وتقسيم وتظبيط و " تأييف " الدستور على اشخاص معينة ؟

هييجي واحد تاني ويقولي ماهو ايه يعني لما يسقط دستوريتهم وبعد 6 شهور من انتخابهم يتعمل انتخابات تاني !!رئاسية وبرلمانية على الدستور الجديد ! يا سلاااام .. هيبقى رجعنا لنفس النقطة اللي احنا فيها دلوقتي وكل الناس بتهرب منها


..


اخيراااا

بغض النظر عن اتفاقي او عدم اتفاقي عن مضمون التعديلات ... وبغض النظر ان نفس الناس اللي قابلة مبدأ التعديلات ممكن تكون عليها تحفظات كتييييييييير على بعض البنود اللي في التعديلات او حتى اللي برة التعديلات ومتلمستش ... وبغض النظر ان التعديلات جاية كلها " لوكشة واحدة " من غير ما يكون لينا الحق في رفض او قبول احد التعديل .. وكأننا بناخد قفص اوطة كله في بعض حلوه بوحشه " شروة واحدة " .. وبغض النظر اننا هنكون رجعنا لنفس النقطة وهي ان الدولة " رئاسية" يتحكم في اغلبها رجل واحد " ولو مؤقتا " ... وبغض النظز عن كل شيئ

إلا ان هذه ثورة .. بكل ما تقضتيه الكلمة

ثورة يعني اسقاط رئيس بحكومته بمجلس شعبيه بدستوره بسلاطاته وباباغنوجه


..

لو اتفقنا على المبدأ .. انه لا تعديلولا ترميم في بيت اصلا ساقط وواقع

البديل بقا .. فمليون بديل مطروح ع الساحة


وبديلي اى ننا نجيب من 50 ال100 بنى آدم محترم من البلد " ممكن يتحط مواصفات معينة ليهم زي الدرجة العلمية والخبرة .. الخ " .. يكون ليه جوب ديسكريبشن كدة

وانا معنديش مانع انهم يبقوا بالتعيين من المجلس العسكري ومجلس الوزرا بشرط ان ال 100 دول يكون فيهم كل الاطياف السياسية ونحط معاهم كمان ممثلين دينيين " شيخ وقسيس "


بعدين ال 100 دول نحطهم في معسكر كدة " فندق ولا حاجة " على حساب مصر ونوفر لهم كل حاجة .. ونجيب لهم أكل وشرب وحريم كمان لو عاوزين " ازواجهم يعني :)) " ويفضلوا بقا ليل نهار مقضينها حوارات لمدة شهرين ولا حاجة لغاية لما يطلعولنا دستور ابن ناس

طبعا في خلال الشهرين دول محدش من الاعلام يقربلهم ولا حد يزعجهم ولا يقرب لهم خالص

وبعدين الدستور الجديد يتعرض ع الشعب رسمي قبل موعد الاستفتاء بشهر ع الاقل ... ويتعمل عليه هيصة بقا الشهر دي .. ايشي العاشرة مساءا على آخر كلام على الاتجاه المعاكس على صباح الخير يا مصر وصباح دريم ومصر انهاردة وبكرة وامبارح وكل حاجة

لغاية لما الناس تفهمه وتهضمه وتعرف هي هتقول ايوة على انهي بند ولأ على اي بند ليتم تعديله

وبعدين يتعرض على الشعب في استفتاء وكل بند قدامه نعم أو لأ

وبلاش شغل سوق العبور ده وحياة ابوكم

..


طيب وخلال الفترة دي ... الكام شهر دول .. ممكن يتعمل " اعلان دستوري " كدة على ورق بفرة حتى ... كام بند يسيّروا حال البلد .. فيهم الحاجات المهمة المتعلقة بالسلطات " القضائية والتنفيذيىة " زنقفل الباب على اي فراغ دستوري .. عشان أمشير عامل عاميله بره


والحكم يبقى لمين ؟

الجيش اهو ابن حلال ولو هو زهق مننا وبقا يكهربنا عشان خلقه بقا ديق اليومين دول .. يبقى مجلس رئاسي مكون من 3 او 5 اغلبيتهم مدنيين

برضه المجلس الرئاسي يكون بترشيح من المجلس الاعلى للقوات المسلحة ومجلس الوزرا .. بمعنى عرض مثلا 10 اسماء والشعب يختار منهم 3 في استفتاء .. ويكون المجلس الرئاسي ده حكمه 6 شهور مثلا ولا تزيد عن سنة لما يسيب المجلس العسكري لحكم

ونحط مثلا " في الاعلان الدستوري " مهام المجلس الرئاسي ده واهم حاجة ان محدش من المجلس الرئاسي ده يرشح نفسه في او انتخابات رئاسية او برلمانية ...

ويكون بس وظيفته تسيير البلد لغاية لما يتم الاستفتاء على دستور جديد وعمل انتخابات رئاسية وبرلمانية بناءا على الدستور الجديد

..





بس كدة ...


ومبروك علينا أمن الدولة اللي اتحل ... والأمن القومي اللي عمرنا ما هنديله فرصة انه يبقى أمن دولة ولا بوليس سياسي تاني !


يالا فتكوا بعافية


آه صحيح


كلنا لازم نروح الاستفتااء ونقول رأينا ... ومحدش له حجة


وفعلا في ناس كتير ناوية تروح .. حتى ناس اعرفها عمري ما كنت اتخيل في يوم انها هتهز وسطها وتروح تنتخب .. دلوقتي انا متأكد انهم هيروحوا عشان عارفين ان صوتهم هيفرق


انا هروح أقول " لأ " للتعديلات الدستورية



وكل واحد لازم يروح ويقول رأيه .. وكلنا هنحترم رأي الأغلبية بعد نتيجة الاستفتاء اللي ان شاء الله هتبقى انزه واشرف استفتاء عرفته مصر


__________________________________


وهذا وقد أقفل المحضر في ساعته وتاريخه !

على فكرة انا ممكن أغيّر اقوالي في اي وقت واقتنع اني اقول نعم مثلا :))


محمود حافظ

16-3-2011 12:20 AM




ملحوظة : أي اخطاء املائية او قانونية او دستورية انا مش مسئول عنها .. انا مجرد مواطن بطيخ معلوماته في القانون والدستور زي معلوماته عن الطبخ

" على فكرة انا ساعات بطبخ حلو "

:P


Posted by Mahmoud Hafez :: السبت, مارس ١٩, ٢٠١١ :: 0 Comments:

Post a Comment


الجمعة، مارس ٠٤، ٢٠١١

عصام شرف .... وقراءة ما بين السطور



..


من افضل الخطوات العملية اللي عملها الجيش لغاية دلوقتي هو اختيار عصام شرف في هذا التوقيت بالذات ، بغض النظر ان الرجل سمعته نضيفة فعلا ، إلا ان اسمه - كما يقال - رشح صراحة من ائتلاف شباب الثورة في احد اجتماعتهم مع المجلس الاعلى ..

الراجل حتى الآن لا غبار عليه ، وحتى اللي معرفهوش قبل كدة راح ببساطة للحاج جوجل وكتب اسمه فوجد مقال للدستور من اكتر من سنة ، يمدح فيه ويذكر انه قال للظلم "لأ" في عز جبروته ... وكذلك الحال لو ذهبنا للحاج يوتيوب هنجد لقائه مع منى الشاذلي في العاشرة مساءا وتقرير رائع عن الرجل الذي لا يحب الظهور اعلاميا ، إلا ان الوكالات الاعلامية رصدته متلبسا في ميدان التحرير .. وامام مجلسي الشعب والشورى وهو يهتف باطل في عز ايام الثورة وقبل سقوط المخلوع مبارك !

إذا فهو - فعلا - رئيس وزراء أفرزته الثورة ... وده من رأيي أقيّم انجاز حققته الثورة حتى الآن ... واكتر حاجة ممكن تثبت لكل من تسول له نفسه ان يفكر انها ليست ثورة ... انها بالفعل ثورة ... تشيل من تشاء - كما جعلت مبارك يتنحى وشفيق يستقيل أو يقال - وتضع من تشاء ... كما وضعت شرف على رأس الوزارة !

ورئيس الوزراء في مرحلة زي ده مهم جدا انه يكون بيتمتع بحاجتين في غاية الأهمية " المصداقية ، الرؤية " .. وهذا لم يتواجد للاسف في شفيق لذلك معظم الطبقة المثقفة رفضته .. بغض النظر انه كان معين من قبل صديق مبارك وانه يحسب على النظام السابق .. إلا ان كل لقاءاته التليفزيونية " وتليفوناته " كانت غير موفقة - سياسيا - على الأطلاق ! إلا ان طبيعته الهادئة نوعا معاه وهندمته في ملابسه - وبلوفره - والاحساس التي يؤخذ عنه تلقائئا انه " إبن ناس" جعله يستقطب كثير من الناس عاطفيا ... بس للاسف احنا مش هنناسبه ... هو شكله مؤدب ومحترم وهادي وابن ناس ... بس مصر لن تدار بالعاطفة وحدها إذا لما يتبعها مصداقية ورؤية واضحة !


..


عصام شرف كان ذكيا من أول قرار اخذه وهو الذهاب إلى ميدان التحرير .. رغم انه كلف بالوزارة امبارح بس ، ودعوة الشباب بدأت برضه امبارح للسيد رئيس الوزراء لكي يذهب إلى ميدان التحرير ... وهو فعلا استجاب للدعوة فورا مما يدل انه لا يعيش في برج عاجي وعلى اتصال سريع مع الشباب


..

امبارح احد اصدقائي بيقولي هو ازاي يروح كدة في مكان عام " ده ممكن يتنش " ... سكت وهلة كدة وقولتله مش هيحصل .. مش بس عشان انا متأكد ان الناس اللي في التحرير هيحموه .. بس حتى اعداء الثورة وبقايا النظام عمرهم ما هيفيدهم قتله ... لو مشي عصام الشعب هيفرز مليون واحد غيره ... بالعكس اكبر مكسب للثورة دي انها اثبتت ان العنف ليس حل للمظاهرات السلمية " كانت قدرت الشرطة على اجهاض الثورة .. او موقعة الجمل .. او حتى اعتداء الجيش الجمعة الماضية " !

..

عصام شرف تربع على القمة لما كسر حاجز الخوف بين الشعب وكبار مسئولين الدولة لما نزل الشارع وسط آلاف الناس وقالهم ان الشرعية منكم وبيكم ...

..

عصام شرف رجّع تاني لمصر منظر اختفى من أيام عبد الناصر .. وهو المسئول مهما كان موقعه لابد وان ينزل ويخاطب الشعب

..

عصام شرف بهيئته البسيطة .. بالكاريزما " البديهية " اللي لا هي كاريزما زيادة عن اللزوم اللي ممكن أن تستغل خطا في يوم ما .. او الكاريزما المنعدمة اللي تخلي رجل الشارع البسيط ينفر منه او يحس انه مش منه او مش شكله ... بهذه الهيئة عصام شرف جعل الكثيرون " وانا منهم " اتفائل أكتر بالمرحلة القادمة

..

عصام شرف بكلماته أثبت للعالم ان الشرعية فعلا للثوار .. واضاف نجاح فوق نجاح على هذه الثورة

عصام شرف قال لو مش قادر اكون مسئول عن المكان اللي انا فيه مش هبقى هنا .. وهبقى هنا في وسطكم ... مشيرا انه هيبقى وسط المتظاهرين .. زي ما كان موجود فعلا من كام يوم ومحدش خد باله منه .. وهو نفسه مكنش بيسعى ولا يتخيل انه هيبقى رئيس وزراء الثورة

..

عصام شرف اللي شوفناه متعب ومجهد من الشمس وتدافع المتظاهرين عليه ولم نحس منه أي تأفف او صلف .. غير ان تعبه كان واضح عليه .. وصبر على الناس " الغلابة" وهما بيشيلوه

..

عصام شرف كان ذكي لما مقالش قسم الوزارة امام الشعب رغم طلب الناس له حتى لا يسن هو بدعة جديدة على رئاسة الوزراؤ واحترم الشرعية ... وفي نفس الوقت وبذكاء سياسي اكد على ان الشرعية للثورة .. الشرعية للشعب .. الشرعية لنا جميعا !

..

عصام شرف كان على يمينه دكتور البلتاجي عضو مجلس الشعب السابق ، وعلى شماله زكريا عبد العزيز رئيس نادي القضاة السابق .. والاتنين مشهود لهم بالنزاهة " وكان فيه واحد بيشد من سيادة رئيس الوزرا الميكرفون ويهتف .. الراجل ده معرفهوش الصراحة "

..

عصام شرف قبل المنصب ده في الوقت ده بالذات بروح قتالية وعارف انه هيتعرض لنقد كتير .. وعارف ان ناس كتير " متعشمة " فيه عشم كبير أوي ... وهو عارف ان المهمة دي محتاجة "صبر وارادة وعزم" زي ما قال في خطابه ... وكان رائع لما قال انه جه ميدان التحرير لكي يستمد الارادة والعزم من ميدان التحرير !

..

عصام شرف أول رئيس وزرا يقول في مكان عام " انا بحلم بمصر " .... ! وكمل وقال " انا بحلم بمصر حرة .. والرأي فيها خارج الزنازين "

..

عصام شرف اللي واضح انه هيحط كرامة مصر فوق الجميع .... الهتاف الوحيد اللي قاله " ارفع راسك فوق انت مصري " !

..

طبعا الحكم على أحد لا يأتي من خطاب او حتى بعض اللقاءات التليفزيونية والمقالات ... لكن بعض الشواهد تؤكد ان اختيار السيد رئيس الوزراء عصام شرف موفق إلى حد كبير ؟.. والأيام كفيلة انها تثبت


ربنا يوفقه للخير ولصالح مصر يا رب


و أخيرا انا متفائل خير بالراجل ده ...


انا متفائل يا مصر



Posted by Mahmoud Hafez :: الجمعة, مارس ٠٤, ٢٠١١ :: 0 Comments:

Post a Comment


Free Web Site Counters
Get a Free Web Site Counters