الثلاثاء، مايو ٢٦، ٢٠٠٩

كان في ولد -مش - رسام



..



Posted by Mahmoud Hafez :: الثلاثاء, مايو ٢٦, ٢٠٠٩ :: 1 Comments:

Post a Comment


الأحد، مايو ٢٤، ٢٠٠٩

25/may/2009

Tomorrow, everything will be determined

25/5/2009
!

Posted by Mahmoud Hafez :: الأحد, مايو ٢٤, ٢٠٠٩ :: 0 Comments:

Post a Comment


الخميس، مايو ٠٧، ٢٠٠٩

7/5 يوم الاستقلال !

تـــحـــــــــــديــــــــــــــــــــث
">

..

تــــــــحـــديث :

الحياة قرار .. الحياة لحظة .... لحظة تفصلنا من حالة إلى اخرى .... قرار يستبدل الصعب بالسهل ... السهل بالصعب .... لحظة خير .. لحظة شر ..... قرار حياة .. قرار موت .... لحظة قرار ... لحظة اختيار ... !
اتسائل كثيرا ... لماذا يُغير الثعبان جلده بصفه مستمرة ، ياترى هو الموضوع فطري .... سهل بهذه الطريقة ؟
اكيد مش سهل ان الواحد ياخد قرار في ثانية انه ينهى فترة من حياته ... مش فترة من حياته ... يعتبر بينهي كل حياته ، عشان يبدأ من جديد ... ومش بس هيبدأ من جديد .. لأ المفروض انه يقنع نفسه انه هيبدأ من لا شيئ ... مش لازم يعرف انه هيبدأ من جديد عشان ميفهمش .. او ميفتكرش انه في قديم اصلا ..!
..
المرايا ...
من رأيي ان اسوأ اختراع اخترعته البشرية هي المرايا .... ايه فايدتها ؟؟ .... هاتقول للكويس انت كويس عشان يتغر ويبطل يبقى كويس .... ولا عشان تقول للوحش انت وحش عشان يكره نفسه ويبقى اوحش !
ياترى المرايا - فعلا - بتعكس صورنا ؟ يعني انا انا هو انا انا اللي في المرايا ؟ يعني نفس العين .. نفس البق .. الشعر ... الملامح.... ؟ يعني انا ده ؟ يعني انا الملامح ؟ ... لأ مش انا الملامح !!
انا الحركة والهمسة .. انا الماضي والحاضر .. انا الهدوء والتعصب .... انا الكيان والاحساس والبرود والمشاعر والشوق والفراق والغدر والأسى والهجر .. انا القرار اللي بيكون فيه أنا ... أنا !

..

أصعب حاجة انك تتنقل من مكان لمكان ومش عارف انك رايح فين بالظبط .... طالع لفوق ولا نازل لتحت .... ولا انت زي مانت .... ولا تبقى كارثة لو الكون كله بيتحرك حواليك ... حاجات بتيجي وحاجات بتروح .. وانت واقف في مكانك "محلك سر" .... وفاكر انك انت اللي بتتحرك !!
يمكن يوم 5/7/2008 كان صعب ... كان يوم مستحيل اني انا حتى اتخيله ، بس أكيد هو مكنش مجرد يوم ، ده كان يوم بـ 25 سنة .... بعمـري .... يوم النتايج والحلول - او اشباه الحلول- .... يوم الحصاد .... اي حصاد ؟!
شيئ غريب لما تحصد حاجة انت مش عارف - لغاية دلوقتي - هي خير ولا شر ... صح ولا غلط ؟ ايه اللي اتزرع عشان ده يتحصد ؟

..

عدت سنة ... بس اوقات كتيرة ببقى ماشي قريب ... بقول لنفسي مش هروح بقا ؟... يعني اي حد بيخرج وبيلف الدنيا بس في الاخر بيرجع بيته ... بيته اللي هو دولته ... بيته المفروض ان فيه حد مستنيه .... مهما غاب ... في حد مستنيه ... هو البيت يبقى بيت غير لما يكون فيه حد مستنيك ؟!!!

..

جميلة اوي العبور كمدينة .... هي فعلا مدينة جديدة .... واغلب اللي فيها جايين لحياة جديدة .... هربانين من الزحام ... ممكن من ماضي غريب .... عريس وعروسة بيبدأوا - فعلا- حياة جديدة ..... حاجة كدة زي الارض اللي كان رايحها الراجل اللي قتل 99 وكملهم ال 100 ... باختصار هي ارض جديدة !

..

من اجمل المواقف اللي بتأثر فيا في العبور ... ان الاقي راجل بيعلم ابنه السواقة في شوارع العبور الفاضية .... كتير اوي ممكن تلاقي ناس بتتعلم السواقة في العبور ....بس الموقف ده جميل اوي .... دوس هنا .. غيّر كدة .. لألأ متسرعش .... ركز في الطريق .... دوس دبرياج .... اشارة يمين ... اشارة شمال ...
مع ان الولد ممكن يكون لسة صغير ... 10 سنين كدة .... بس ابوه اكيد عارف انه لازم هيجيله يوم هيسوق العربية .. لوحده !
أصله أبوه ... !

..

من اجمل الحاجات اللي في العبور ... غير انها عبور طبعا ..... ان احد اخواتي فيها ... وبجد من اجمل اوقاتي لما اكون بزرهم ، جميل اوي روح الاسرة .. والعيال بتذاكر او بتتخانق .. مش هتفرق .... او كذا ايد ممدودة في طبق واحد وقت الأكل ... الاجمل من الأكل ... التجميعة بتاعة الأكل !
كتير زوج اختي بيحب يعمل حاجات واكيد لما حد بيعمل حاجة بينده على ابنه - لو ليه ابن - عشان يساعده زي ما طبيعي ان الابن يسمع ابوه ينده له - لو ليه اب - عشان يقوله اعمل حاجة ... وعادي ممكن الاب يضرب ابنه او يذقه او ينغزه وهو بيعلمه حاجة عشان يركز فيها او يتعلمها صح ... وجوز اختي ساعات بيعمل كدة ... وطبيعي ان ابن اختي ممكن يعيط ويدايق من كدة .... اللي مش طبيعي بقا اني بقول في نفسي - لابن اختي - يا غبي ... يا بختك .... !

..

لما كنت في شبرا كان عندنا مرايا - كانت في طرقة كدة وبطول الجسم تقريبا وكانت دايما مشروخة او مكسورة - وكنت ببص فيها مش اقل من مرتين تلاتة يوميا .... وكنت انا انا .... 25 سنة انا !
ولما نقلت للعبور وبصيت في المراية ، لاقيت انا انا برضه ... بس انا انا .. مش هو انا انا اللي كان هناك .... المرايا للأسف مش بتعكسني انا !!
عشان كدة قعدت حوالي 6 شهور مفيش مراية في البيت .... تخيل ! ... انا مش محتاج اشوفني عشان اعرفني ! ... واكيد مش محتاج اشوفني عشان غيري يعرفني !
لو انا مش شايفني من غير مرايا .... او ولو غيري مش شايفني من غير مانا ابص في المرايا ..... يبقى انا ملييش لازمة ... يبقى انا مش موجود !!
مش عاوز الغبط نفسي .... بس بصراحة صدق اللي قال اللي بيبص في المراية كتير .. بيتجنن !!

..


على العموم انا - اللي في المرايا- لما كنت في شبرا
مش انا - اللي في المرايا- لما بقيت في العبور
الفرق شاسع .... مع ان الصورة واحدة !

..

بس لغاية دلوقتي مش عارف .... هو القرار كان صح ولا غلط ؟
وحياتي قبل " اللحظة" دي كانت احسن .... ولا بعدها ؟

يمكن انا مقدرش احدد دلوقتي ... عشان انا لسة "طفل بيحبي" ....

دي مجرد سنة !!




Posted by Mahmoud Hafez :: الخميس, مايو ٠٧, ٢٠٠٩ :: 1 Comments:

Post a Comment


Free Web Site Counters
Get a Free Web Site Counters