الاثنين، أغسطس ٢٣، ٢٠١٠

عريس حبيبتي -- يحي قدري

عـريـس حـبـيـبـتي
وااااااد جــدع
من أبــو ظـبي
أبُــوه لِــوَااا
وأمُــه قـــال
ماسكالها حـي
يعـني بصراحة
عريـس عــسـل
مالـوهـش زي
لـو عـنـدي بنت
عـمـري يــوم
ما حُـوشها عـنـُه
وإن جاني واد
أتمنى يـطـلع
قـــد سِـنــُه
عشان يصاحبه
أو حتى يخطب بنت عـمُه
!!!!!!!!!
بـتـقـولي إيـه؟
هـترفــضـيه
تـسـتـني إيـه؟
تـسـتـني مـيـييييين
الأولاني
كان عـبـيـط

مربوط في ديل أمـُه بخـيـط
والتـاني
قـلـنا مـنـعـرفـوش
وساعـتـها كان وقت امتحان
بس ده
مش لاقي عـيـب
هقولك إيه؟
طب مين يـجـيـب لك
كـرواسون
وسيمـون فـيـمـيه
وجبنة ماركة أبصر إيه؟
أنا !!! أـــــــــــــــــ
مش هـو بـرضـه
ِاسمه إيه؟
إنما أنا هجـيب منين؟
ده أنـا لو هجـيـبلـك
كارت شحـن
مِـحْـتاج أحـوِّش جـُمعـِتـين
تسـتـني مـيـن؟!!!
مشكـلـتـك
إنك بنت ناس
حـتـة فراولة معـسّـلة
في الأناناس
اِزاي هـتـُعـصُر نـفـسَها
رابع ورا في الميكروباص
!!!!!!!!!!!!!
مش لايـقـة فيكي البهـدلة

والرقـص وسط المهـزلة
على لحـن مكسـور الميـزان
إجـبـاري فيه الأسـئـلة
وزمان قالوها في المثل
حـِبـي الـفـقـيـر
واِتبـسطـي بـيـه
وإن جـه غـني
اِوعـي تـسيـبـيه
بتـبُـصـي ليه؟
اتجوزيه ...اتجوزيه
اتجوووووزززييييه

_______
يحيي قدري - مدونة حلاوة

Posted by Mahmoud Hafez :: الاثنين, أغسطس ٢٣, ٢٠١٠ :: 0 Comments:

Post a Comment


Free Web Site Counters
Get a Free Web Site Counters