مبحبش اكتب في السياسة بس لو اعتبرنا
السياسة هو كل شيئ يخص الفرد في حياته
اليومية فخلينا ندردش شوية بما أني
مواطن مصري وعندي حقوق" !
فبما أني جبت سيرة الحقوق فخلينا نشوف حقوق اي انسان  كان جنسه لونه
لغته ديانته
الأكل .... اي حد من حقه ان يأكل ،.. اكل يعينه علي
الحياة ويعين جسده ... مش طعام يكون سبب في
مرضه ويمكن موته او عجزه باقي عمره

المياة .... الشرب... في اكتر من ٧٠٪ من مساحة الكرة
مياة .... فأقل حق لأي انسان ان يلاقي
كوباية مية نضيفة .... تصلح للشرب لما يبقي
عطشان

الأمان ... من اي حد انه يحس بأمان علي ارض
الله .... ينزل من بيته يروح شغله او
مدرسته في أمان ... يركب عربية او "قطر"
وميبقاش مقلق انه في لحظة ممكن يبقي فحمة
او مروح بيتهم اشلاء او واحد مختل يطلع
عليه بطبنجة ميري يغربله..... يروح سيبر
ومتأكد ان فيه أمان ومش هيرجع "ده لو رجع"
ووشه مش باينله ملامح ....  يروح يصلي في
كنيسة او جامع ويبقي حاسس انه بيعبد الله
علي ارض الله في امان .... مش يبقي بيصلي
تحت حراسة مشددة !

العدل .... من حق كل الناس العدل .... من حقي
لما اتظلم احس ان حقي رجعلي ... من حقي لما
اخويا يتحرق في قطر مع الاف زيه ... او لما
ابويا يغرق في عبارة مع الف زيه .... او لما
صاحبي يتنفجر يوم عيده ..،. او لما يتسرق
فلوسي وفلوس بلدي عيني او او او ..،، احس
ان في عدل ... احس ان فيه حاجة تشفي غليلي
وتشيل النار اللي جوايا اللي ممكن يتحول
في لحظة لفكرة تدمرني وتدمر
المجتمع ...كله

الحرية .... من حقي ابقي حر ... ربنا خلقني حر ...
بل وفضلني عن كل الكائنات بحرية
الاختيار ..... الانسان هو الكاين الوحيد
اللي يقدر يختار اي شيئ ليعبده او يأكله
او يعبده وبعدين ياكله ..... فازاي انت
تستعبدني وتحبس حريتي !


أنا مش هقول ديمقراطية وحق الانتخاب
وعدم التزوير والمساواة الاجتماعية وحق
التعليم وحقي أني الاقي فرصة مناسبة
تعويضا لسنين عمري ضيعتها في تعليم ولا
حقي في زواج وتكوين اسرة ولا حقي في
رعاية صحية تليق ك بني ادم .... ولا اي حاجة
من الحاجات بتاعة المجتماعات المرفهة
دي ....

الحكومة اللي متعرفش توفر للفرد انه
يأكل ويشرب و يحس بالعدل والأمان ويعيش
كان حر زي ما ربنا خلقه .... يبقي حكومة
تروح تبيع فجل أحسن !
..

ومع رفضي التام لمواضة "الانتحار" ...
بس ممكن يكون الكلام أعلاه سبب منطقي بيخلي الناس اللي حاولت تنتحر
 كانت شايفة انها فعلا مش عايشة