|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الأربعاء، أغسطس ٠٢، ٢٠٠٦ آه م الغِل .. شعر رانيا منصور آه م الغِل.. لما يشل لما تحس انك متكتف وان عروقك نافرة ف جسمك وان سنانك دايسة عليك لما تحس انك جواك عمال يتدغدغ وانك ساكت راضي وخامد كانوا زمان بيسموك نار واهو دلوقتي.. شعلة اتخمدت بعد ما قادت آه م الغِل . . كنت ف حالي ولا على بالي فجأة لقيت الدنيا اتقلبت قالوا اتهاجمت قمت جريت فجأة لقيتني بجد صحيت آدي صورهم إمسك طُل آآآآه م الغل وآه م الذل لما يصحّي الموت جواك إمسك طل . . هما عيالهم بيشخبطوا فوق الصواريخ كنُّه ده يوم العيد عنديهم هنطيَّر صواريخ يا ولاد واحنا عيالنا رخيصة علينا قبل عليهم هيروح حبة وييجي جداد يعني خلاص؟ هما عيالهم دول ف القلب واحنا عيالنا اللي ولاد كلب؟! عارف لما تحس بأنك عايز تمنع حتى الميّه عايز تمنع روحك نفَسك عايز تشطب بالجير اسمك عارف لما تحس بأنك كلك ذنب لما تحس انك مقهور لما تحس انك مكسور نفسك تمسك واحد تاكله آآآه .. ده الغل لما يذل وانت مكتف عمال تاكل جوا ف نفسك وتلوم غيرك وتلوم نفسك . . آه من غِلي وضيقي يا ناس قلبي هيلغي الدق خلاص مش عايزة اكتب غير بالدم او بالسم ولا بلاش اصلي بكده مش هاطفي النار كان نفسي احضر يوم ما اتحرقوا لجل ما اشم.. أجمل ريحة حرق هتطلع من أحقر ما الدنيا تضم وآه م الهم آآآه م الغل.. دمعك خلّص؟ صوتك فنّش؟ شفت صورهم؟ شفت جلودهم دي المحروقه؟ شفت بطونهم دي المشقوقة؟ شفت ايديهم؟ سامع صوتهم؟ لا مش ساكتة هناك بتحسبن آه م الغل.. كنت انا بافرح لما يقولوا يا قلبك لابيض من دلوقتي خلاص هاتجدد قلبي اتسود نفسي ادوق من حزني دموعهم نفسي أهوّي عليا بإيدهم المقطوعه والمسلوخة نفسي أسوّي الأكل بنارهم مانا جوايا ضلوع محروقة 
 |