|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الثلاثاء، ديسمبر ٢٣، ٢٠٠٨ الاهرامات وابو الهول  الصورة داخل الهرم ربما لا يلفت انتباهنا كثير عند المرور بميدان التحرير في وسط القاهرة إلا منظر الكابلز.....الاجانب المتناثرين في وسط البلد .... اصدقاء الصم والبكم الذين يتقابلون عادة امام كنتاكي بداية طلعت حرب .... النساء وقد تفنن في كل ما يلفت النظر ... في حين انه في الجهة الاخرى يوم المتحف المصري الذي يتردد عليه المئات او الالاف يوميا من غير المصريين ، في حين انه لا يلتفت إليه ، وقد لا يعرف مكانه الكثير من المصريين ... للأسف ! * بلاش دي كتير اوي بنسافر اسكندرية ، وبنطلع المحور وقبل ما ننزل من المحور عشان نمسك الطريق الصحراوي بنشوف على ايدينا الشمال 3 حاجات واقفة شامخة كدة من حوالي 5 او 6 آلاف سنة ... ايوة ايوة الحاجة اللي بيقولوا عليها من عجائب الدنيا السبعة ان لم تكن افضلهم ، حاجة كدة الناس بتدفع بالعملة الصعبة وتيجي من آخر بلاد العالم عشان تيجي بس تشوف عظمة رمز من رموز اعظم حضارة في تاريخ البشرية وهي الحضارة المصرية القديمة ... كتير اوي منّا مرحش الهرم غير وهو صغير ، ابتدائي او اعدادي بالكتير ، وانا مكنتش رحته من اعدادي الا من كام يوم مضت ، لآرى ابداع ما قال أحدهم - للأسف - عنه " انها مجرد شوية حجارة ورمل محطوطة فوق بعضهم ". أن تقرأ مئات الكتب لتشرح سر حلاوة " عسل النحل " لا يعد هذا ذو قيمة اذا لم تتذوق العسل بنفسك . قرأت كثيرا عن روعة لوحة " الموناليزا " او الجيوكاندا للفنان العبقري " ليوناردو دافنشي " لكني قرأت ايضا ان من لم يقف أمام هذه اللوحة الـ 35 سم في 20 سم فقط - التي تعلق في أحد أركان متحق اللوفر الشهير بفرنسان- فلا تكفيه جميع الصور التقليد التي ملئت الكتب التي تعلق على هذا الابداع ... من النظر اليها والسحر الذي ينقل إلى المرء عندما ترى نظرة الموناليزا وتضحكاتها الساخرة ! على كلٍ ، محدش هيحس الكلام اللي جاي ده غير حد راح الهرم وشاف روعة هذا العمل وما حوله ،، ..  على الجميع ربط الاحزمة ، والضغط على زر التخيل ، لارجاع ذاكرة الاهرمات من خياله ، التي قد تكون سجلت من قبل سواء من الحقيقة او من التليفزيون ووسائل الاعلام المختلفة في الجيزة يوجد 3 اهرامات ، خوفو وخفرع ومنكرع ... ترتيبهم من الاكبر للأصغر ، واهرامات الجيزة غير مرتبين كما هو شائع انهم بجوار بعض بترتيب تنازلي ، ولكن من يراهم على الواقع يجدهم مرتبين كأطراف مثلث ، ولكن صور كتير شائعة - خطأ - انهم جوار بعض جدا وبجوارهم جدو ابو الهول ، يمكن تكون الصورة التقطت من القمر الصناعي كدة - مع اني لا اعتقد - لكن على الواقع غير ذلك .. فلندع لعقلنا ان ينطلق في الخيال لنفسر بعض التظريات - العقلية جدا - التي بنيت على اساسها الهرم نتخيل اننا بنينا مربع على الارض ثم قمنا برص " حجارة " داخل المربع ورسمنا مربع اصغر فوق هذا المربع وقمنا برص الحجارة ثم مربع اصغر وهكذا حتى ينتهي المربعات الصغيرة فالاصغر حتى تتكون قمة تحتها هرم رباعي الاوجه .. قام المصريون القدماء عمل ذلك بكل بساطة ، كانوا يرصون الحجارة الضخمة على هيئة مربع ثم يردمون عليها من رمل صحراء سيتي التي تحيط بالهرم ويضعون الحجارة فوق المربع الاكبر كشكل مربع اصغر ثم يردمون حتى يستطيعون التسلق على الحجارة هم ومعداتهم ،، وبعد ان تم الانتهاء من الشكل ، سيظهر شكل هرمي ولكنه مدرج ، فيسهل تسلقه ، ولكي لا يحدث هذا قاموا بصقل الهرم كله بمادة رخامية لكن للأسف هذه المادة تآكلت بمرور الزمن ، وقد تضح هذه المادة في الهرم الاوسط من الاعلى فقط ، انا الاول كنت احسب ان المادة دي كنوع من انواع ترميم الهرم ، ولكني اكتشفت مؤخرا جدا انها من قديم الازل وان الهرم كله كان كدة فعلا  خلفي الهرم خفرع وفي قمته جزء من المادة اللي المفروض كانت مغطية كل سطح الهرمطيب بس الامر ليس بهذه السهولة فقط ! طيب ببساطة اي شكل بهذه الضخامة ورتب بهذا الشكل لابد وان ينهار على نفسه ، دون حتى ان يكتمل ، وهذا ما حيّر الكثيرون ... احجار الهرم وضعت ببساطة فوق بعضها بنظرية التفريغ او الـ Vacume اي سطحين املسين تم التصاقهما ببعض بتفريغ هوائي بينهما يكون الفصل بينهما صعب جدا ، مثلا لبيسة القلم لما تحاول تحطها على لسانك ومرة واحدة تلزق وبعدين تزحزحها يمين وشمال لغاية لما تفك ، او البتاعة اللي مش متذكر اسمها دي اللي بتتحط في فاترينات المحلات على الزجاج عشان يعلق عليها بعض الاشياء او تتحط على زجاج السيارة من الخلف .... اللي بنبلها باللسان ونحطها على الزجاج تلزق دي ، هي دي بالظبط ... صعب انها تخرج غير لما تتهزر يمين وشمال ... جميل جدا ، اترصت الحجارة بتاعة الهرم بنفس الشكل ، بس العلماء استغربوا برضه ، ليه برضه الاهرامات واقفة شامخة كدة رغم مرور العصور وحدوث هزات ارضية كبيرة جدا قادرة على فك تفريغ الهواء الموجود بين احجار الهرم وبالتالي انهيار الهرم ... جه عالم ايطالي اعتقد اسمه " مكافلي " وعمل في الهرم الاكبر من جوة 3 اوتاد مجوفة كدة عشان يحاول يشوف ايه اللي موجود بين الصخور ، وجد رمل ناعم جدا خد عينه منه وحلله لقى انه نوع نادر جدا من الرمل الموجود في قاع البحر الأحمر !! ... مش بس كدة لقى ان الرمل ده بمرور الزمن بقى رمل مشع فراحوا قافلين مكان الاوتاد دي حتى لا يأذي الاشعاع الناس !! فحبيبات الرمل الموجود بين الصخور كانت تعمل كوسادات او " سوست" لامتصاص اي اهتزازات ارضية ، حتى لا تقوم هذه الاهتزازات في فك التفريغ الموجود بين الصخور ! .. يوجد في الهرم الاكبر 5 غرف فوق بعضهم في وسط الهرم .. الغرفة الاولي ، اسمها غرفة الملكة " كوين روم " ، اسمها بس كدة ، بس مفهاش ملكة ولا حاجة ، ودي بقا !! ودي تبعد 104 متر عن فتحة الهرم بس لأسفل قاعدة الهرم ، ويقال انها اعدت ليدفن فيها الملك في الاول ، ولكن بعد ذلك يقال ايضا ان الملف خوفو اترفع من مرتبة ملك إلى كونه ابن الإله او شيئ من هذا القبيل فدفن في الغرفة الثالثة الغرفة الثانية في مستوى سطح الهرم وتبعد حوالي 47 متر عن فتحة الهرم بس بالطول ، وفي التلت الاخير من الخندق المؤدي الى الغرفة الوسطى يوجد البهو الكبير او نفق اكبر شوية يصعد لأعلى وهو يبعد حولي 48 متر من فتحة الهرم الاكبر ولكنه يصعد لأعلى ليكون غرفة اعلى غرفة الملكة والغرفة الوسطى. واعلى الثلاث غرف ، يوجد غرفتين في قمة الهرم لحفظ توزان الهرم . مع العلم ان جميع الغرف تقع في منتصف الهرم بالظبط ، يعني لو رسمنا خط مستقيم من اعلى نقطة في الهرم حتى اسفل الهرم هنلاقيه يمر بمنتصف كل الغرف حتى غرفة الملكة التي تقع تحت سطح الهرم !! نيجي بقا نوصف يعني ايه غرف فوق بعضها في نص الهرم وازاي متصلين ببعض بفتحة دخول الهرم ... لسة متكين على زرار التخيل ؟! في فتحة لدخول الهرم - بنتكلم ع الهرم الاكبر دلوقتي - عبارة عن خندق ماشي على طول لمسافة بسيطة وبعدين الخندق ده بينقسم لـ 3 خنادق واحد بينزل بميل لتحت ليتجه الى غرفة الملكة اللي تبعد عن فتحة الهرم 104 متر ، ويمتد خندق بخط مستقيم لأعلى نوعا ما ليتجه الى الغرفة الوسطى اعلى غرفة الملكة ، وخندق آخر يمتد لأعلى يكون البهو العظيم ثم غرفة الملك اللي المفروض فيها التابوت ..! غرفة الملكة قلنا تبعد عن فتحة الهرم حوالي 104 متر تحت سطح الارض .. سقفها على شكل مثلث فاقد قاعدته زي الشكل ده ^ .. وده عشان المفروض ان حمل الهرم كله هايبقى على سقف الغرفة دي ، فده نوع من انواع توزيع الحمل ، كما اكتشفوا حاجة غريبة اوي في غرفة الملكة دي ، هي ان فيها بير المفروض انه بيطلع ماية من ماء النيل ! .. والبير ده المفروض انه مفتوح على برة على بير برة الهرم ، عند مركبة الشمس اللي راح وشافها هناك ! ويقال ان الفتحة بتاعة البير اللي في غرفة الملكة دي كانت مخصصة عشان لما يدفنوا الملك يطلعوا من البير ده وبعدين من برة خالص يقفلوا البير بالرمل ، مع العلم ان المفروض ان الهرم صمم بحيث ان اللي يدخلوا بتابوت الملك يدفنوا وميخرجوش من فتحة الهرم ، عشان فاتحة الهرم المفروض هتتقفل ديناميكيا -بطريقة سأقوم بشرحها بعد قليل- بعد دخول جثة الملك وكنوزه . والغريب برضه ان في نجمة معينة لم تسعفني ذاكرتي بأسمها بتكون وقت فيضان النيل في اتجاه غرفة الملكة من ناحية فاتحة الهرم ، بحيث انها تضيئ غرفة الملكة اللي تحت الارض .. ! حاجة غريبة بجد .. وقت فيضان النيل ! ونجمة تضيئ الغرفة اللي المفروض هيدفن فيها الملك ! حاجة كمان لو خدنا خط مايل من منتصف غرفة الملكة الى الجانب الشرقي من الهرم وكذلك خط مستقيم في الى الجانب الغربي ، هنلاقيه مؤدي الى فاتحة تهوية صغيرة ، دي دلوقتي حطوا فيها زي شفاطات .. جدير بالذكر برضه ان جهات الهرم الاربعة تيبكال الاتجاهات الاربعة الرئيسية شمال جنوب شرق غرب ، يعني لو جبنا بوصلة هنلاقي شمال الهرم - اللي هو فيه فاتحة الهرم - في اتجاه شمال البوصلة بالظبط وكذلك الجنوب .. شرق ... غرب ! نيجي بقا للغرفة اللي في الوسط ،انا معرفش عنها كتير الصراحة ! الغرفة العليا بقا ، اللي فعلا لاقوا فيها التابوت فاضي ! قبل الدخول على الخندق اللي بيودي لغرفة الملك ، في حاجة اسمها البهو العظيمة زي خندق مايل كدة بس واسع شوية وبيبدأ يبقى دايق عند فاتحة غرفة الملك ، الغريب بقا ان لاقوا ان تابوت الملك والغطا بتاعه ميدخلش بأي حال من الاحوال من فاتحة غرفة الملك !! حتى يظن البعض ان التابوت اتحط الأول واتبنى الهرم عليه ، ودي فكرة انا شايفها مش منطقية ! في البهو العظيم بقا لاقوا فيه آثار لحاجة كدة مش عارف اوصفها ، هي زي مزلاق بحيث انه يتشد فتنزل صخور من فوق وتدحرج في البهور العظيم المائل ثم يتجه في الخندق ليقفل خندق دخول الهرم من بداية انقسام الخندق لتلات الخنادق المتجهة ل 3 غرف الهرم !! وفعلا علماء الاثار لغاية دلوقتي مش لاقيين تفسير منطقي ان ازاي التابوت بتاع الملك دخل من فتحات الهرم التي لا تستوعب باي شكل ضخامة هذا التابوت ! وايضا لا يجدوا تفسير لعملية الدفن ، يعني اللي دخلوا بالتابوت ، هيدفنوا ويقفلوا الهرم من جوة وبعدين راحوا فين ؟! خصوصا ان اهم حاجة كانوا حريصين عليها ان الهرم ده يتقفل بطريقة آمنة جدا ويبقى فتحه اقرب إلى استحالة !! طيب واحد هييجي يقولي اومال اتفتح حديثا ازاي ؟؟!! للعلم ان الهرم اتفتح في عهد الخليفة المأمون ، يعني من حوالي 220 سنة ولا حاجة بس ! وللعلم كمان ، هما قعدوا يفتحوا في الهرم ما يقرب من 15 سنة وبمعدات ثقيلة ، حيث قاموا بالحفر عشوائيا في الصخور حتى تقاطعوا النفق المؤدي الى غرفة الملك ومن هذا النفق اتجهوا الى اعلى حيث وجدوا باقي غرف الهرم ، واستنتجوا فتحة الهرم الاصلية .. واتفتح الهرم ، واتعمل المجهود الضخم ده في فتحه ، أملا ان يجدوا دهب وكنوز الملك خوف ، ولكن عندما دخلوا وجدوا ما أدهش الجميع وقتها وحتى الآن ، وهو انه لا يوجد داخل الهرم اي شيئ من كنوز الملك ولا المومياء بتاعته ولا حتى غطاء التابوت الي يعتقد انه كان من الدهب ؟! والذي ادهش علماء الاثار ، وكل العالم ، مش بس روعة وعبقرية تصميم الهرم ، عبقرية اللي سرقوا الهرم رغم كل الاحتياطات الرهيبة اللي عملوها ... ويعتقد ان من سرق الهرم هم من الناس اللي ساعدوا في بنائه ، ولكن حتى الان لم يتوصلوا لكيفية حدوث عملية السرقة الرهيبة دي دون عناء تكسير الصخور او ظهور اي علامات تبين عملية السرقة ، لدرجة ان الهرم مغلق على نفسه من آلاف السنين وكانوا كل هذا الوقت يعتقدون ان بداخله كنوز ومومياء الملك خوفو... و.......... كفاية كدة عشان تعبت من الكتابة  ___________________________ * المتحف المصري : يعتبر من أروع المتاحف الأثرية في العالم وبه كمية رهييييييبة من آثار مصر ، الذي تجعل كل من يترددون عليه لا تكفيهم زيارة او اتنين او تلاتة لكي يستطيع ان يرى كل ما فيه ، ليس هذا فقط ، ولكن يوجد في حاويات من الاثار والمومياوات التي ليس لها مكان في المتحف والمفروض ان يعدوا لكل هذا في المتحف الذي يصمم حديثا .. لكن فعلا .. المتحف المصري يستحق الزيارة مرات .... وحرام على اي مصري يمر من امامه ، ولا يتكرم على نفسه ويدخل ويرى روعة ما بداخله * للعلم دخول ساحة الهرم وابوالهول للمصريين والعرب بـ 2 جنيه فقط في حين انها للأجانب بـ 100 جنيه ، ودخول المتحف المصري للمصريين والعرب بـ 4 جنيه فقط ! * حاجة اخيرة ، انا لست متخصص في الاثار ، ولا حتى ارتقي لدرجة هاوي ، وكتاباتي السابقة مجرد تعليق ومحاولة فهم وناتجة من بعض القراءات او الحديث مع ناس بتفهم نوعا ما في الاثار ، وكل المعلومات والاستنتجات السابقة تحتمل الصواب والخطأ . تــحــــــــــــــــديث - المغزى من بناء الهرم ، لا يمكن ان يكون اعتباطا ، ولكن ذهب العلماء ان هناك اسباب كتيرة غير مكانة الملك التي وصلت لمنزلة الآلهة في بعض العصور الفرعونية وتخليدا له ، بل هناك اسباب عرفنا بعضنا وربما لا نستطيع معرفة الباقيمثلا في عصر خوفو انتشرت البطالة بدرجة قد تؤدي لانتشار الجريمة وكان وقتها الملوك تملك كل كنوز البلد لدرجة انها لو وزعت على الجميع فسيكفيهم ، ولكن الملك خوفو خاف ان يجعل من الشعب عالة ويعطي له الفلوس من غير جد ولا تعب فقرر الملك عمل مشروع قومي وهو بناء " الهرم الأكبر " ... وتم بناء الهرم الاكبر في 20 سنة ، واشتغل فيه مئات بل آلاف العمال ، وبما انه مشروع ضخم ويشتغل به اعداد مهولة ، فانشأت على حسه وبجوار مكان الهرم الخدمات من اماكن بيع الأكل والمستشفى .. الجميل بقا ، انه عندما وجد بعض مومياوات العمال وعمل اشاعة لاجسامهم ، وجدوا اثار لكسر في رجل بعضهم وكسر في الايادي والاصابع بسبب الشغل في الهرم ... الاجمل بقا ان هذه الجروح والكسور تم علاجها بحرفية طبية عالية ! - حتى الان بيكتشفوا الغريب لدرجة الدهشة في الهرم ، عندما سلطوا احد انواع الاشعة اعتقد السينية على الهرم باجهزة علية الدقة عشان يكشفوا لو ماذا كان هناك اماكن داخل الهرم لم يتوصلوا اليها بعد ام لا ، الغريب بقا ان لاقوا الاشعة دي بترتد تاني ليهم كأنها مراية !! - عند وضع قطعة من اللحم الطازجة في غرفة الملك العليا ، ولمدة تزيد عن شهر ، تكتشف انها لسة طازة ، وتقوم بطهيها وأكلها عادي خالص ! - درجة الحرارة في جميع غرف الهرم واحدة وثابته وهي 20 درجة سيليزية ! - لو جبنا موس حلاقة وقعدنا نحلق بيه مية مرة جوة الهرم عمره ما هيبلد ! 
 |