|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الاثنين، فبراير ٠٩، ٢٠٠٩ اقولك ايه ؟  اقولك ايه ؟ اللي انا حاسه ده مش شعور بداية حب ، اعتقد اني حسيت شعور الحب ده قبل كدة... يمكن يكون دي بشاير حاجة اكبر من كدة دي حاجة مختلفة ، يمكن الاول مكنتش عارف احددها .. حاجة كدة زي ما الواحد ياكل حاجة حلوة بس مش قادر يميز هي حلوة منين بالظبط يعني متعرفش هي حلاوتها في كونها مسكرة وحلوة ، ولا حادقة وشهية ... حاجة كدة بتمتلك الواحد من جمالها ... .. اقولك ... انتي " المنحة" اللي ربنا باعتهالي .... انتي المنحة وبس ... يمكن متاخديش بالك من نظرتي ليكي من " الاول " .. يمكن انا نظرتي في الناس بتخيب في اوقات كتيرة يااااه .... ياما خابت ! بس تفتكري هتخيب المرة دي ! معتقدتش .... عشان بجد حاسك انتي "المنحة" بكل ما فيها ... .. عارفة ... طول عمري مقتنع ان القدر له خططه ، خططه اللي بتتفرض علينا رفضنا او قبلنا ... وانا خلاص بقيت اقبل بخططه ، عشان ياما رفضت ... وكانت النتيجة ان الحيطان اتكسرت من تخبيطي فيها واستمر القدر بتنفيذ مرسوماته وخططه بكل دقة واحكام ! اصل برضه مش صدفة ، تجيلي في الوقت ده ، في المكان ده ، مع الهدية اللي بعتهالي ربنا .... تصدقي لو صدقت ، هحتار جدا ... يا ترى ايه الهدية فيهم ؟ ياترى ايه "المنحة" الربانية ؟ معقولة هتكون كل حاجة بتتحقق في نفس الوقت كدة ؟ معقولة خطط القدر هتكون المرة دي في صالحي بكل ما فيها ، ومش بس كدة ... دي محطوطة بقمة الدقة والاحكام عشان تبقى النتيجة واحدة .. السعادة! .. منكرش اني كتير ببقى مش عارف ، يعني أستسلم بقى وخلاص ؟! امشي الطريق من اوله تاني ، واحاول اصلح من الاخطاء اللي وقعت فيها... تفتكر هتصيب المرة دي ؟! اول مرة يتحد فيها الاتنين ويقولولي ايوة .. قلبي وعقلي ايوة ايوة والف ايوة يمكن هي دي الهدية اللي جت في وقتها بالشكل ده وبالطريقة ده ياربي مليون صوت بيرد على بعضه جوة ! .. عارفة ... يمكن تكوني مش عارفة لما ببص في عنيكي كتير يمكن متكونيش بتاخدي بالك بس بجد بروح لمكان بعيد اوي ، ييجي مليون سنة لقدام مكان بيبقى فيه "الدنيا" وانا وانتي بس ! وساعات بيبقى حوالينا ماكيتات تخصنا احنا بس .... بتجري وتلعب وتتنطط .. كتير اوي ! يخرب بيت اللمعة في عنيكي بجد ! حاجة كدة من الجنة ! .. مش هاقولك انتي مختلفة ،، مش هقولك انتي غير ! مش هقولك افعالك يعجز اي بشر عن انه يمنع نفسه من ان يعجب بيها ! مش هاقول عليكي نشيطة لدرجة مستفذة مش هقول على نظرتك مش هقولك على جمالك اللي ممكن يكون عادي جدا ، لدرجة تخليه مش عادي خالص ! مش هقولك ومش هقولك اصلا مش هعرف اقولك .... عشان ببساطة انا فشلت اني امنع نفسي وقلبي وعقلي من انه يعجب بيكي بس عاوز اقولك حاجة واحدة بس "انتي جميلة اوي" 
 |