يا دكتور عصام شرف ، يا رئيس وزراء الثورة ... ارجوك خيب ظننا واعلنها على الملأ انك مبعتش القضية

..

قولها يا دكتور صراحة انك رفضت وبترفض ممارسات وضغوط المجلس العسكري عليك

..

قولنا يا دكتور انك فعلا بتحارب وقدمت طلب تغيير 12 او 7 وزراء وتم الرفض

..

ارجوك يا دكتور عصام قولنا انك لوحت بالاستقالة أكثر من مرة والضغوط كانت اقوى منك لكي تستمر

..

قولنا يا دكتور انك رافض وبترفض انك تكون "بترينة" للمجلس العسكري وبقايا الحزب الوطني اللي بيحاولوا "يبلفوا" الشعب

..

ارجوك يا دكتور قولنا انك مبعتش القضية عشان منصب او جاه او رضا حد

..

قولنا يا دكتور انك لسة "مؤمن" بميدان التحرير اللي افرزك كرئيس وزراء

..

قولنا انك لسة فاكر بوسة الغلبان المسكين اللي باسك في ميدان عشان حس فيك الأمل الجاي

..

ارجوك يا دكتور وضّح موقفك

..

ارجوك قولنا انك لسة مكفرتش بالثورة ...

..

قولنا يا دكتور انك مبعتش ومش هتبيع دم الشهداء بـ " دية" من ميزانية الدولة

..

ارجوك يا دكتور قولنا انا معرفش حاجة عن القنابل المسيلة للدموع والاعصاب اللي استوردت بعد الثورة واضربنا بيها من كام يوم

..

قلنا يا دكتور انا طالع عين أهلى عشان أوقف ممارسات زبالة الداخلية في السويس وفي كل حتة ومش عارف

قلنا يا دكتور أرجوك...

..

قولنا انك مش قادر على فطاحل أمن الدولة اللي دايرين يبوظوا البلد وبيستخدموا كل اوراقهم عشان يضغطوا عليك وعلى المجلس العسكري

..

قولنا يا دكتور انك مش فاهم ايه اللي بيحصل .. والظباط القتلة بيخرجوا ليه والوزراء الفاسدين بياخدوا براءة

..

قولنا مالوه القضاء بتاعنا ؟ قولنا دول بيضغط عليهم وبيطلع عين أهلهم وبيمارس معاهم اوسخ الاساليب

..

قولنا انك زيك زينا مش عارف تروح فين ولا تيجي منين !

..

قولنا دول بيهددوني وبيستخدموا معايا اوسخ الاساليب

قولنا بس وهتلاقينا كلنا دروع بشرية بتحميك وبتحمي عيلتك كلها

..

قولنا بحق كل واحد ادهس تحت عربية شرطة .. بحق كل مصري شجاع فتح صدره للنار ومخافش

..

ارجوك قلنا انك مش هتردد نغمات ما قبل الثورة وهترفض التظاهر "ضمنيا" بحجة الاستقرار المزعوم

..

قلنا ان الكرسي مغيركش ولسة بتحن لميدان التحرير

..

ارجوك قلنا ... ولو مش قادر تواجه المجلس العسكري لوحدك .. تعالى ميدان التحرير يوم الجمعة

..

وقلنا وقول للمجلس العسكري كلمة حق واحدة

..

تعالى وقولنا ولو جت انك تعلن استقالتك من ميدان التحرير ... زي ما اعلنت شريعتك منه

..

تعالى وشوف أقوى شعب واحسن شباب وخير جنود الارض وهما بيشلوك ع الاعناق تاني وبيحموك بحياتهم

ارجوك يا دكتور .. عشان خاطر ولاد مصر .. واحفادها ... عشان خاطر جيداء لما تكبر تبقى فخورة بجدو

.

.

.

تعالى الميدان ..... وقول كلمة حق !

Posted by Mahmoud Hafez :: الأربعاء, يوليو ٠٦, ٢٠١١ :: 1 Comments:

Post a Comment