شكرا شباب مصر ... شباب ثورة 25 يناير

انتو الشباب .. انتو النواة اللي بدأت ده كله ... انتو اللي بدأتوا بفكرة عبقرية على الفيس بوك .... انتو الشباب ياما اتقال عليه فاشل و"سيس " ودلوقتي كله آمن ان انتو الروح اللي رجعت لكل الشعب المصري ... منظركم اللي يفرح في جامعة الدول وشبرا وفي كل مصر .. واصراركم على دخول التحرير .. ووقوفكم في وش جبروت الشرطة ... في وش القنابل والرصاص المطاطي والحي ..... هو اللي بث الشجاعة في كل الناس وخلاهم ينضموا ليكم ... الـ 50 - 60 الف اللي كانوا في ميدان التحرير يوم التلات 25 يناير بالليل بيجروا من طلقات وقنابل الشرطة يوم خمسة وعشرين بعد منتصف الليل .... هما اللي جمعوا نفسهم تاني بدون خوف وبقوا ملايين وملايين في التحرير وفي كل حتة في مصر ... خليتوا مصر كلها بكل فئاتها .. تتكلم في السياسة والحق والعدالة الاجتماعة ... خليتوا السواق والبواب والمهندس والدكتور يتكلم على الدستور والريس وصلاحياته .... انتو اللي ابهرتوا مصر والعالم .... انتوا اللي اسقطوا النظام بجبروته وهيئاته ووزاراته واعلامه .... و انتو المستقبل اللي هتنضفوا مصر من كل خراب كان وتصلحوا كل فساد ... وانتوا اللي هتخلوا البلد دي جنة بايديكم وبروحكم اللي هي روح مصر

شكرا خالد سعيد .. بموتك حسستنا انك قريب مننا اوي .. ان الظلم قريب اوي من اي واحد فينا .. يمكن عشان انت شبهنا اوي وممكن كنت انت تبقي اي حد فينا ... صحيت فينا الرغبة في الانتقام ليك .. للحق .. مستحيل ما يقرب من 700000 بني آدم يقول كلنا خالد سعيد على الفيس بوك ... وغيرهم كتير في الشوارع في مصر والعالم تعاطف مع شخصيتك .. عمر ده كله ما يكون هباءا ... اكيد انت انسان تستحق ده وربنا جعلك سبب لتجميع شباب كتير تحت اسمك ... بسببك سحقنا شرطة بوزيرها وقوادها وظبطها

وامنها المركزي ... افرح يا خالد اسمك دخل التاريخ والاهم حبك دخل قلوب ملايين المصريين ... ان شاء الله في جنة الخلد

شكرا وائل غنيم ... محدش ينكر " والتاريخ عمره ما هينكر رغم نفسنة المنفسنين " انك كنت شرارة حق حركت واثرت في شباب كتير ... كنت حلقة وصل جمعت كل الشباب ... كنت الحلقة المفقودة ... الرجل الخفي اللي ليه مبدأ من غير ما يكون وراه مصلحة ... اللي عرض نفسه للخطر ... للتعذيب ... للأعتقال .. للسحل وضياع مستقبله عشان مبدأ آمن بيه وحط حياته كلها في ريسك عشانه ....

وائل : لو انت عميل فانت اجدع عميل في العالم ... واجدع أجندة :))

شكرا البرادعي ... اتحملت كتير .. واتهمت بأنك عميل واتخونت والكلام طال سمعتك وسمعة عيلتك بسبب مبدأ برضه أمنت بيه ...انا مصدق جدا انك كنت أمين جدا ولم تعطي الشرعية لأمريكا لتغزو العراق وتقريراتك كانت واضحة بعدم وجود اسلحة دمار شامل في العراق ... واعطيت نوبل في السلام عن استحقاق ... شكرا لأنك حطيت نفسك قدام شلة عصابة وطاغية عمره 30 سنة سلطة ... شكرا لأنك لابيت طلب الشباب والناس اللي كانت بتناديك .. في حين ان نفس الشباب نادت اسماء كتير عشان تقف قدام النظام وهما معاهم الاسماء دي اختارت طريق السلامة " امثال عمرو موسى والجنزوري "

بغض النظر عن النوايا ، وشكوك الاجندات والعمالة وركوب الموجة اللي زرعتها فينا النظام وبقايا واكيد كل الناس تاثرت نوعا ما باشاعات النظام حتى لو كنا دايما مقتنعين بيه .. بغض النظر عن ده كله فانا احيك على وطنيتك ولو كنت سترشح نفسك للرئاسة فلتدع الصندوق الانتخابي يحكم

شكرا عصابة مبارك ... شكرا لكل اقذار الوطن اللي جمعوا الشعب ده على كلمة واحدة .. جمعوا الشباب على حب الوطن بطريقة غير مباشرة ... على الشحن السلبي لسنوات كتيرة ... لعمر شباب .. ليتحول بقدرة قادر لطاقة نور ايجابية تجعل الطبيب يكنس شوارع مصر حبا ! ..... شكرا عصابة مبارك لانكم زدتم ايماننا بالله ان الحق لابد ان ينتصر وان الباطل لابد وان يدهس تحت اقدام اصحاب الحقوق .. عاجلا أم آجلا

شكرا مارك زوكربرج " عمري ما بعرف انطق الاسم الاخير بتاعه " ... يمكن عمر خيالك ما هيجيبك ان موقعك اللي اسسته عشان الشباب يظبطوا بعضشيهم ... انه يكون سبب غير مباشر في ثورة حقيقية على أرض اعظم بلد في العالم

شكرا شباب 6 ابريل .... كنتوا ومازلتوا صوت الشباب على ارض الواقع اللي طالب بحقوقه في المشاركة في الحياة السياسية ... لعبتوا دور كبير اوي في الثورة وقبلها ... يمكن قابلت منكم شباب يوم 25 وما بعدها ... بس حتى معرفش اساميهم ... بس فعلا شباب زي الورد و دماغكم حلوة اوي واكيد هتتوظف كتيير في الخير اللي جاي لمصر ... لمستقبل مصر

شكرا الاخوان المسلمين ... تعرضكم للظلم على مدار السنوات .. بغض النظر عن ميولكم السياسية " اللي هي حق كل مواطن مهما كانت انتمائاته " ... إلا انكم واجهتم كل الظلم والتعذيب والتشهير والتخوين ، ورغم الانقسامات الداخلية إلا انكم مازلتم متماسكين كاكثر قوة سياسية معارضة للنظام منظمة وقوية ولها وزن سياسي على مستوى مصر ... غير انكم اكتر ناس محتكين بالشعب والطبقات المختلفة

بجد بدون الدخول في النوايا ... اعمالكم تدل على وطنيتكم ...والايام القادمة سوف تثبت الكثير ... فكونوا عند حسن ظن الوطن ... وخيبوا آمال المفترون عليكم بوجود اجندات اجنبية وترتيبات داخلية واطماع سياسية .. فانا ومثلي كثيرون يحسن الظن بكم

شكرا ايها الاخوة المغيبيين ... كنتوا تحدي لينا كلنا في كل حتة .. نتخانق في الشارع والمواصلات عشان نحاول نوضح ونشيل غمامة الاعلام المصري ... يا ريت كلنا نتعلم من ال 17 يوم اللي فاتوا دول

شكرا لكل الاخوة المسيحيين والمسلمين .. الاطفال والعجائز ... الشباب والشابات ... اللي اعتصموا في ميدان التحرير " بارت تيم او فول تيم " .... كل الناس اللي ساعدت ان الثورة دي تنجح على ارض الواقع

شكرا قناة الجزيرة : بغض النظر عن العمالة والتخوين " اللي هو الطيشة في اي حاجة ضد الحكم السابق " إلا ان التغطية الاعلامية كانت فوق الرائعة ... الحكومة تمنع البث تغيروا الترددات ... تمنع الترددات تنطوا على قنوات تانية وتعملوا دمج .. تكسرلكم المكتب وتسحب الكارنيهات وتمنع الصحفيين بتاعكم وتضربهم وتعتقلهم وبرضوا باصرار فظييييييييع تستمروا في تغطية فوق الممتازة " بالعربي وبالانجليزي" وعلى الهواء مباشرة .. وتكوني سابقة في اي مفاجأة بيعملها النظام ، لدرجة اني حسيت انك عرفتي من البلطجية انهم هيجموا قبل النظام :D

أكتر من شكر ... الى شهداء ... انتم الرجال .. سواء كنت رجال او نساء او اطفال .. كبار او صغار .. انتم الرجال .. انتم افضل ما ولدت هذا الوطن .. اذا كان هذا الوطن به شرفاء فانتم اشرفهم .. واذا كان به نبلاء فأنتم النبلاء .... ارقدوا في سلام ....فلم ولن ننسى دماءكم الحرة التي رسمت طريق حريتنا .... سنحفظ اسمائكم ونحفظها لأولادنا ... سنسمي بها شوارعنا ومدارسنا ومحطات المترو ... سيحكي التاريخ عن 400 بطل اضاءوا طريق الحرية واحرقوا قلب حاكم ودولة وكيان طاغي بصدورهم واروحاهم .... هنيئا لكم الجنة بإذن الله ... يا أطهر ما أنبتت هذه الارض السمراء!

شكرا مصر : شهر قبل الآن كنت تمتلكني فكرة الندم اني رجعت من امريكا ، راودتني افكار شيطانية اني كان افضل ليا اني اعيش في بلاد العم سام حتى لو " غير قانونيا" خير لي من العيش تحت حكم ذل وقهر وبلد يغتصب فيها الحقوق " عيني عينك " وممكن في لحظة الواحد يلاقي نفسه مولع في قطر او اشلاء في دور عبادة او متعلق ومتكهرب في قسم او غرقان في سفينة او طالع عليه مجنون في قطر بمسدس ميري او حتى مضروب على قفاه من غير ما ياخد حقه ... ويموت " فطيس " .. بس دلوقتي .. بفضل شبابك وبفضل شعب الحر ... احنا احرار ....احرار بجد !!

مصر ... انتي رفعتي راسنا تاني لفوق اوي .... خليتي كل الشعب المصري جوة مصر وفي ميع انحاء العالم يقول بأعلى صوته .... أنا مصري وأفتخر .... المصريين في اسبوعيين بقوا مصدر إلهام العالم كله

مصر مش بس اهرامات ونيل وابو الهول ...مصر هي ناس ... بشر .... احرار !!

مصر ..... يا اعظم و أجمل بلد في العالم ... والله العظيم بحبك