|
|
الاثنين، يناير ١٥، ٢٠٠٧
شخصيات أنترنتية .... كــ... شخصيات هلامية
طيب جميل جدا !
مجتمع الانترنت ـ والمجتمع العادي اللي بنعيشه !
اتفتح الف حوار في هذا الموضوع تقريبا
وكل الاراء متقاربة .. تقريبا..
- مجتمع الانترنت ده شئ بيفرض نفسه على الجميع .
- التكنولوجيا بقت في كل بيت ... والانترنت خلاص بقا شئ اساسي عن ناس كتيرة
- مجتمع الانترنت مجتمع يتمتع بالسرعة ... والشمول .. والوضوح ...
- يوجد في الانترنت جميع المجالات التي تتخيلها والتي لا تتخيلها .
- تستطيع بكلكة ماوس ان تجد ما تريده في لحظات .
- اعطني انترنتا ... واتركني .. لا اريد شئ آخر !
- الانترنت ساعدني كثيرا في تنمية مواهبي ... واخراج ما لدي من قدرات .
- اكتشفت بداخلي اني انسان ... ولا اروع ! ... والفضل يرجع للانترنت ... ربنا يخليها لينا .
- انا لو بعدت عن النت يوم ... أموت ... أموووووووووووت ... أمووووووووووووووت !
- يااااه ... مقولكش على الانترنت .... ده كفاية عندي قهوة كتكوت ! ... بالدنيا وما فيها !
- بذمتك تعرف تجيبلي حد في الدنيا عنده
ثقافة ... (عارف كل حاجة )
ورقة ... ( الرقيقة جدا )
وموهبة ... ( محسن أشعار )
وحكمة .... ( حكيم زمانه )
وايجابية ... ( نشيط جدا )
ورزانة ... ( رزين جدا )
وسكوت ... ( ساكت جدا )
................... الخ
يووووووووووووووووووه
ده النت مليان ... ملياااااااااااااااااااان .... ملياااااااااااااااااان ......... مليااااااااااااااااااان ناس مكنتش تحلم انك تقابلهم في الحياة ...
____________
فعلا مليان ناس متعرفش تشوفهم في الحقيقة !
اتقال كتير عن مجتمع الانترنت ـ ولسة هايتقال أكتر
ناس كتير دخلت تتفرج على المجتمع اللي بيقولوا عليه ده
ومعرفتش تخرج منه تاني ... أدمنته !
وفي ناس مكنتش لاقيه نفسها في الحياة برة ...
او معرفتش تتعامل مع البشر اللي برة ...
جت النت وكانت فاكرة انها هاتلاقي ملايكة هنا ..!
وفي ناس داخلة تتجوز !
وفي ناس عارفة انا عاوز اقول ايه .. !
وفي ناس داخلة وفاهمة وواعية لكل حاجة !
وفي ناس دخلت وتاهت ونسيت ان الحياة مش مجرد ماوس وكي بورد .. وايقونة !
وفي ناس داخلة تعوض نقص عندها !
وفي ناس داخلة تستعبط !
وفي ناس ... أصلا أصلا ... مش كويسة !
!
____________
ونرجع ونقول ...
جميل جدا !
كتير منا فاهم الكلام اللي انا قولته
او بيوحي لنفسه انه فاهم كدة ـ
بيوحي لنفسه انه عارف ان النت ده في مميزات وعيوب !
وان الناس اللي فيه مش كلهم على طبيعتهم
ولو حد اتكلم معاه او طلب رأيه في النت مجتمع النت والناس اللي عرفهم من النت
هايرد على طول بأسطوانه معروفة جدا
" النت طبعا زي اي شئ في مميزات وفي عيوب ـ وزي ما ممكن تجيب منه حاجات وحشة - في حاجات كتيرة كويسة - وطبعا مش كل الشخصيات اللي موجودة على النت بتبقى بطبيعتها بس ................................... الخ الاسطوانة اللي اتشرخت دي !"
كلنا عارفين
وكلنا فاهمين
وكلنا نقدر نرد على اي سؤال !
وكلنا بنعرف نمسك الماوس ونروح على كلمة " إضافة رد " وندوس كليك
وكلنا بنعرف نرص الكلمة جنب الكلمة ، والجملة جنب الجملة ونذوق ونحلى في كلامنا عشان يهز مشاعر كل واحد يقراه
ونعرف نحط نقط وفواصل وعلامات تعجب !
_______________________
جميل جدا !
بس ليه بقى بننسى
بننسى ان مجتمع النت ده ...
هو أنا وانت وهو وهي .... بكل ما فينا
بما فينا من عيوب أكثر وأكثر مما يتوقعها كل فرد
ليه دايما بننسى وبنفصل المجتمعين عن بعض !
ليه دايما لما يكتب " النيك نيم " حاجة ... بننسى ان الـ " نيك نيم " ده
هو هو اللي ممكن يبقى ماشي في الشارع بيعاكس دي وهياكل دي بعنيه
هو هو اللي ممكن يصحى من النوم يجري ع البلكونة عشان يتفرج على الخناقة حتى قبل ما يغسل وشه !
هو هو اللي بيتعامل مع البشر ... مرة يصدق ومرة يكدب ومرة يخون !
هو هو اللي ممكن جدا يسكت عن الحق ويكبر دماغه
هو هو اللي ممكن يشتم واحد بلفظ مش كويس عشان طرطش عليه مية بعربيته
هوهو اللي ممكن يغلط غلطات تخليه - لو عنده دم - ميبصش في المراية تاني
هو هو اللي بياكل وبيشرب وبينام ... ويصحى عشان ياكل ويشرب ويقعد ع النت وينام تاني !
هو هو اللي حتى ممكن ميفكرش هو آخر مرة دخل فيها الجامع امتى او اخر مرة عمل فيها خير لوجه الله امتى !
ليه بننسى حياتنا بكل ما فيها
لو اوقات بنحاول نهرب ونهرب ونهرب ونهرب
للاسف
مش هاينفع نبني حياة لينا تانية ونركن الحياة الحقيقة على جنب
والله الانترنت مش هاتحققلنا حاجة
مادمنا احنا مش كويسين
الانترنت ... عمرها ما تخلق انسان !
ايه فايدة كتابة كلمة " العدل " مليون مرة ... وانت ظالم
ايه فايدة كتابة كلمة " الامانة " مليون مرة ... وانت خاين
ايه فايدة كتابة كلمة " الصدق " الف مرة .... وانت كاذب
لو معندكش مبادئ في حياتك
يبقى مع احترامي ،،
طظظظظظظظظظظظظظظظظظظظ في النت
وطظظظظظظظظظظظظظظ في اي شئ تسميه مبادئ على الانترنت
يا أخي يارب النت تقطع عن العالم كله بتاع 20 سنة كدة عشان نفوق
ومنلقيش حاجة نعوض بيه النقص اللي عندنا ... الا بتعويضه في حياتنا الحقيق
يمكن نفوق !
_____________________
Posted by Mahmoud Hafez ::
الاثنين, يناير ١٥, ٢٠٠٧ ::
4 Comments:
Post a Comment
|
|
