|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الأربعاء، سبتمبر ١٧، ٢٠٠٨ اعلانات هذا الـ رمضان  بالنسبة للأعلانات هذا العام - على الرغم من اني مش متابع تليفزيون اوي - إلا ان اناشايف ان في تقديم رائع في مجال الدعاية عامة وفي مجال الدعاية المرئية والمسموعة خاصة !وبما اني ليا باع في مجال الدعاية ، فعجبني فعلا بعض افكار اعلانات هذا العام منهم مثلا اعلان اتصالات ... بتاع " متخليش الشبكة تختارلك "فعلا صاحب الفكرة لعب على نقطة مهمة جدا ، ان تقريبا كل الشبكات عاملة تعريفة قليلة للكلام بين افراد نفس الشبكة - حتى اتصالات نفسهم - فهو حب يضرب في الميزة اللي مقدماها كل شبكة دي بنظام جديد بخدمة احسن ....غير كدة اخراج الفيلم واسلوبه التراجيدي - الفكاهي .... خلى الاعلان نجح وعلق مع الناس فعلا .. واكيد الاعلان ده باع ...وده مقياس نجاح وسيلة الدعاية عموما اما فودافون فبرضه لعبتها من نفس المدخل .. بس بطريقة تانية ... كل الشبكات منزلة تعريفة اقل ما بين افراد نفس الشبكة .. هي برضه عاملة كدة ودخلت ميزة جديدة ان التعريفة اقل من الاقل .. في فترة من 1 : 9 صباحا .. واللي يلاحظ هنا .. هيلاقي الفترة صغيرة جدا ومش مستخدمة خالص بالذات في رمضان ، وكمان هي بتلعبها في الاعلانات من بالليل للصبح ومفيش اي حاجة توضح ان التعريفة المخفضة دي من 1:9 صباحا بس .. يعني ربع الليل تقرييبا غير من الشبكة وانت بتشترك في الخدمة ، فهي بتعمل فرقيعة اعلانيةو وتقولك من بالليل للصبح الدقيقة ب 10 قروش ... يعني الواحد يقعد يرغي زيادة عن ساعتين الا تلت بكارت بعشرة بس ! ، واصلا الفتة دي نوعا ما زي ما قلنا مش مستخدمة .. غالبا من 1 : 3 الناس بتبقى نايمة بعد ماتش التراويح او المسلسلات والبرامج الرمضانية ، ومن 3 : 4 اللي بيتسحر او حد بيقراله شوية قران قبل الفجر ...ومن 4 : 5 الفجر ولو برضه حد هيقراله شوية قران بعد الفجر ، ومن 5 : 9 سواء اللي هينامله شوية قبل ما يروح الشغل ، او اللي هيكمل نوم لغاية الضهر او اللي هيستحرم يبوظ صيامه بكلام حب وبتاع ، واصلا محدش بيكلم لغاية الضهر في رمضان عشان كله بيبقى سهران وبيصحى متأخر .. فمن الاخر العرض بتاع فودافون "فشنك" ... بس اسلوب الاعلان وطريقة الدعاية بتاعته " سمعت " ... وكمان اخراجه الفكاهي نوعا ما ... ده كله يخلي الاعلان يبيع ... .اما بيبسي بقا ، فنوعا ما غايبة عن الساحة إلا باعلان احمد حلمي اليتيم ... انا مشوفتش اعلان غيره ، لو في حد شاف غيره يقولي / غير كدة الاعلان بتاع احمد حلمي في ساقطة اعلانية خطيرة .. بغض النظر ان حسين الامام شخصية تعتبر لاشخاص كثيرة - وانا منهم - شخصية غتتة بالفطرة ... إلا ان الاعلان في غلطة كبيرة وهي ارتباط الشطة الهندي اللي هي اقوى انواع الشطة بالبيبسي ...يا راجل هو في حد لما ياكل شطة وبقه يولع .... يشرب وراه بيبسبي عشان يطفيه ؟ ... اصل الصودا لوحدها فيها نسبة لازعان احيانا لما بتبقى زيادة الواحد بيحس بحرقان في بقة ، اقوم ايه احط على الشطة بيبسي .. ومش ميرندا اللي فيها صودا قليلة .. لأ بيبسي اللي فيه صودا زيادة .. على كدة العميل لو وصله فكرة اعلان وسمع الكلام وشرب بعد الشطة بيبسي هيكره الشركة على حسين الامام .. وهيلاقيها فكرة فاشلة جدا ... غير كدة استخدام فيس احمد حلمي انا شايف انه بقى محروق " نوعا ما " اعلانيا ... محبش انا استخدام ممثل في اكثر من اعلان حتى لو كان في مجالين مختلفين... صحيح ليه مجبوش نانسي في رمضان مع بيبسي ؟! ... دي كمان لنظرة اعلامية وعلى النقيض من بيبسي ...كوكاكولا .. اعلاناتها مع الوجه المحبوب - على الاقل ليا - كريم عبد العزيز ... واخراج الحملة الاعلانية " المتقن " .. وتعددها الناجح ... وانتشرها .. ما بين كل فاصل وفاصل تلاقي اعلان مختلف في نفس المضمون ... وكله بيهدف لحاجة واحدة تقريبا ..كوكاكولا بتتشرب مع المسلسل .. .. فانا شايف ان اعلانات كوكاكولا ناجحة وهتبيع كتير .. .نيجي بقا للعبقري بتاع اعلانات " موبينيل " .. انا شايف مسئول الدعاية بتاع موبينيل هو من افضل - اذا لم يكن الافضل - كمسئول دعاية في مصر .. بس خايناه شوية حتة العروض اللي بتقدمها الشبكة للعملاء .. واعتقد الى حد كبير مش هو اللي مسئول عنها غير كدة فهو عبقري فعلا ... والعبقرية تكمن في انه بيستطيع بذكاء ان يربط كل الاعلانات بتاعة الشركة ببعض فزمان ربط ياسمين عبد العزيز الممثلة المحبوبة بكذا اعلان ورا بعض وبعدين جاب القرد اللي بيتكلم في اعلان " اتسخط قرد لو مكنش فيها إنّ " .. مع ياسمين عبد العزيز في اعلان ليهملما رخصوا كل كروت الشحن وفي رمضان ده عمل لعبة حلوة اوي ... جاب اعلان كبيييييييييير ان موبينيل غيرت شبكتها وجابت شبكة جديدة تخدم الجيل الثالث 3g ... بغض النظر من ان حكاية الشبكة الجديدة دي هجص × هجص .. نيجي للبداية موبينيل لغاية قريب مكنش عندها الخدمة الجديدة 3g اللي سبقتها بالخدمة دي فودافون وقبلها اتصالات ... فبعض ما ظبطت شبكتها " القديمة " على انها تخدم الجيل الثالث ، اتحطت في مأزق ....؟ هي تقول للناس دايركت انها دخلت الخدمة الجديدة .. وساعتها كله هيقول ياااااااااه هي موبينيل لسة فاكرة - واتقال فعلا- ... ولا تعمل ايه... فطلعت اشاعة انها تقول انها جابت شبكة جديدة تدعم ال 3gوباعت الشبكة القديمة ... اهي بالمرة تعشم الناس اللي دايما تشتكي من سوء خدمة الشبكة القديمة بان هيبقى في تحسن مع الشبكة الجديدة ، وكمان تخبرهم بخبر وجود الجيل الثالث في الشبكة الجديدة ... وهنا برضه هتقع في مأزق تاني .... على رأي الواد الغتت " والشبكة القديمة راحت فين ؟! " ... ولسان حال اي واحد موبينيلجي .. آه يا ولود اللذينا ده كله بتضحكوا علينا بشبكة قديمة ؟! .... لأ هنا خرجوا نفسهم من المأزق بفكرة انهم باعو الشبكة القديمة لدولة " شونجوجو " في مزاد سري .. وجابوا بتوع دولة شونجوجو وهما بيشكروا في الشبكة ،وهوبااااااااااا راح رابط واحد من اشهر ابطال اعلاناتهم في الاعلان ده وهو " القرد اللي بيتكلم " .. عشان من الاخر يفكر بكل اعلاناتهم او حتى جزء منها ... فعلا انا شايف ان موبينيل كدعاية ناجحة جدا ، وده اللي بيخليها تبيع رغم سوء خدماتها ، وده يأكد فعلا ان الدعاية مهمة جدا حتى لو معاك منتج سيئ ...! دي تقريبا اغلب الاعلانات اللي علقت مع الواحد على السريع غير كدة في اعلان كويس جدا وعجبني جدا .. بتاع بنك الطعام .. المليان يكب على الفاضي .. خرج نوعا ما من اعلانات التبرع اللي بتحسسني انهم بيشحتوا بطريقة قديمة غير كدة كمان بتوع دعاية مستشفى السرطان 57375 بدأوا يتحسنوا شوية .. اعتقد المسئول بتاعهم اتغير.. .بتوع اعلانات جمعية " رسالة " مقبولين ... بس في احسن شيبسي و " رمضان كريم يا مصراوي " .... اعلانتهم معقولة كفاية كدة ... رمضانكم كريم 
 |