|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الجمعة، نوفمبر ٢٨، ٢٠٠٨ وخاصمني يا زماني و خاصمني يا زماني... و ارجع صالحني تاني نسيني اللي جرالي... في العمر الأولاني يا زمان حنون و غادر... أنا مين؟ ما تشوفني تاني الواد أبو ضحكة تطلع... م القلب الأخضراني و اللي زرعت صوته... فدان ورد و أغاني مالي دبلت و رودي... و كاس همك سقاني ! و انت مزمزم قيودي... و كرباجك كواني ! .. و لا بد عن يوم محتوم... تترد فيه المظالم أبيض على كل مظلوم... و أسود على كل ظالم و مهما كان اللي هشه... الطير مصيره لعشه و اللي بيظلم يا بايا... و خلى ظلمك حكاية ندعو عليه بالهداية... و الرب موجود و عالم و لا دايمة إلا المحبة... و الظلم هوه اللي رايح مين اللي خلى الأطبة... تعرف تداوي الجرايح ! و مهما كان اللي هشك... يا طير مصيرك لعشك ! _____________ عبد الرحمن الابنودي - تتر مسلسل ذئاب الجبل غناء على الحجار 
 الخميس، نوفمبر ٢٧، ٢٠٠٨ ...... ... ولسة بحاول أنسى حاجات كتير مضت !
الاثنين، نوفمبر ١٧، ٢٠٠٨ يا حبيبتي قصدي يا اللي فهمت يوم إنك حبيبتي عامله إيه؟ رغم إن الغدر ساكن حضن قلبك لازم اطّمّن علِيهْ قلبي صابُه البُعد لكن.. غصب عنّي لسَّه داء الضعف فِيهْ هوه ده القلب اللى سبتيه ويّا نارُه هوّ دا القلب اللي كان بُعدك مرارُه واللي تاه مشوارُه بَعدك.. وانطفى في الحلم ضَيُّه واللى مش هتلاقى عمرك قلب زيُّه قلب لمّا احتاج يفضفض بعد غدرك "ما ابتداش بـ"ازّاي؟" و"ليه؟ !ابتدا الأول وقال لك: عامله إيه؟ .. قلب عارفاه من بدايتُه فاتح الباب للّي فايتُه قلب بانياه الجراح بس مسكون بالبراح يفتحُه لْكل الخلايق.. حتى لو منهم نهايتُه حبي ليكي كان طبيعه فْ قلبي مش إحساس جديد حبي ليكي.. شيء لقيته ببصمتُه جوَّه الوريد حب علّمتيني اصونُه وعد صمّمناه بإيدنا.. وْقلنا يبقى الصدق لونُه عمري ما اتصوّرت قلبك يكسر الوعد اللي بينَّا واللي صُنته فْ يوم يخونُه كنت خايف -من بداية القصه- من آخر فصولها هل هتبعدنا الظروف؟ هل هيفضل حبّنا مسجون بخوف؟ هل بعادنا يكون نصيبنا ولاّ هيفضّل يسيبنا؟ ....ولاّ... ولاّ كل مشهد في النهايه.. ياما جرّبتُه ف خيالي وْياما خُفتـُه إلاّ غدرك... عمري في الفهرس ما شفتـُه خليتيني انْدَه على قلوب الخلايق غصب عنّي.. وْمالتقيش كله بيقول: "انسى نارها "والسعاده الحلوه عِيشها.. وماتقاسيش مش مهم القى السعاده الأهمَ ازاي اعيش.. .. يا حبيبتي قصدي يا اللي فهمت يوم إنك حبيبتي كان زمان... كنت باتمنى اني اشوفك يوم في حِلمي كنت افكّر فيكِ دايماً قبل نومي كنت باخلع ويّا صورتك ليل همومي كنت اشوفك كل يوم الصبح لكن جوّه ليل الوحده من غيرك.. بالاقي الكون مفيشْ كنت باسأل صورتك الحلوهْ تِجيني.. مَابْتَجِيشْ والنهارده.. بالتقي صورتك ليلاتي جايّه مادّه الإيد بدمعك عقلي يرفض.. بس يصرخ قلبي: هاتي جايّه بالعذر المكرَّر تشرحي.. واشتاق لك اكتر وامسح الدمعه اللي نازله..وْضحكتي في الحلم تكبر رغم إنك بعتي قلبي.. وْضاع خلاص مستقبله بس عُذرك كنت دايماً باقبلُه غصب عنّي..كنت بافرش رمشى تاني جوَّه حلمي واحلم انّك يوم تعدِّي واصْحى من نومي والاقي دمعتك كات حارقه خدِّي وامّا باصحَى.. كنت افكّر لو هتيجي بجدّ.. إيه هيكون جوابي؟ هل هاثور وانصر كرامتي؟ ولاّ يبقى الردّ صمتي؟ ولاّ إيه؟ والحاجات الحلوه بينَّا.. بس هانساهُم بإيه؟ غنوتينك... اللي حبيتهم عشانك شارع الشوق اللي ياما مشيته لاجل اوصل مكانك !!!!!!!!! اسمي ويَّا اسمِك على القلب اللي في النخله البعيدَه فرحتك دايماً بِخَطـِّي.. وْساعة الإيد الجديده ! والنهارده.. عقلي مدّ الإيد في قلبي وطلّع النخله وقلَعها حتى أحلامي اللي ضاعت.. بالخساره لغيري باعها حتى ساعْة الإيد خلعها !! وْبرضه باشتاق لك زياده ليه عملتي القلب راهب...وانتي مش قدّ العباده؟ خليتيني الصبح افكّر خليتيني ف نومي افكّر واوهم القلب اللي حبك إني هانسى وْللأسف !!!باشتاق لك اكتر .. يا حبيبتي قصدي يا اللي فْهمت يوم إنك حبيبتي فاكره لمَّا كتير سألتي ليه باقول كل الأسامي إلاّ إسمِك؟ كنت باسكت.. عارفه ليه؟ كنت حاسس إن إسمِك.. فوق ما يتحمِّل لساني كنت حاسس إن إسمِك لو نطقته لوحدي اكون إنسان أناني وانتي عارفه.. إني مش إنسان أناني كنت حاسس إن إسمِك مش حروف كنت حاسس إنه درعي لو هتقتلني الظروف اسمِك انتي بانطقه دلوقتي عادي واحفظه دلوقتي عادي زي أسماء اللي قبلك واللي بعدك واللي عاشقينِّي الساعادي صدَّقيني لو هتيجي فْ يوم لقلبي مستحيل لو يتفتح يبقى إيه شكل القصيده.. لو خيانتِك مُفتتَح؟ :كنتِ دايماً بتقولي لي لو هتطلب منِّي حاجه.. قول ماتطلبش السماح والنهارده جايّ باترجَّاكِ بسّ فْ كلمتين يا حبيبتي إنتي عارفه انِّك خدعتي وانتي عارفه انِّك جرحتي كفَّري عن ذنب قلبك وابعدي عن قلبي حبِّك لو سمحتي ___________ القصيدة للجميل - أشرف توفيق
السبت، نوفمبر ٠٨، ٢٠٠٨ كان يوم " أسود " .. يوم ما جيت !!  مع انني ليس لدي نفس للكتابة عن اي شيئ ،، لأني اكتشفت اكتشاف رائع .. انني كلما أكتبني .. أكتئبني ،، ولكن الكتابة تلح عليا ان أمضي في مدونتي أي تدوينة بتاريخ يوم ميلادي 11:13 مساءا 8/11/2008 تحديثات ____________ بغض النظر عن اغنية زي الايام دي المرفق كلماتها في البوست اللي قبل ده ،، لكن بجد انا بستغرب جدا من احوال الدنيا معايا .. اكيد اللهم لا اعتراض .... الدنيا ماشية عكس .. وعشان مكنش من الذين يعلقون مشاكلهم على اقرب شماعة تقابلهم .. فخلينا نقول انا اللي ماشي عكس مع الدنيا .. يعني يالة امشي عكس مع نفسي كدة واقول 8/11/2007 كان في حلم جميل اوي ... قريب اوي كان بالنسبة ليا قريب .. مكنش سهل أكيد بس قريب من كام ساعة كدة اتسألت سؤال بمناسبة ان اليوم بيوافق يوم ميلادي على فكرة ... يوم ميلادي واقعية جدا عن " عيد ميلادي " ... عشان مش شرط يكون يوم ميلادي هو " عيد " .. بالعكس تمام ... لو صح التعبير ممكن نقول " حزن ميلادي " أو " كان يوم اسود يوم ما جيت " ..! اي حاجة .. مش مهم ........ على فكرة برضه ، انا بخرج .. وهخرج برة الموضوع كتير .. عشان اصلا مفيش .. بس هتشعب كتير بس هحاول متوهش مني ! - اتسألت " ياترى كان نفسك تبقى مع مين وفين في عيد ميلادك ده ؟!" السؤال اتسأل وانا بلمت قدام الشاشة .. وزربووووووو .. شريط حياتي كله مر من قدامي بس اول حاجة جت قدامي 8/11/2007 يااااااااااااااه في اليوم ده كنت بتمنى ايه ؟ وبتمناه ازاي ؟ ومع مين ؟ في اليوم ده كان ايه اللي بيحصل ؟ وليه ؟ وازاي ؟ أد ايه اليوم ده كان جميل !! وكانت احلامه وردية اوي ! يااااه .. اد كدة الاحلام العادية بقت وردية زيادة عن اللزوم ؟! تفتكر لو رجعت تاني هتحلم تاني ؟ هتفكر تاني ؟ هتعمل ايه هه ؟! تفتكر كنت متوقع انك انت تبقى انت دلوقتي ؟! تفتكر كنت متوقع ولو لواحد في المية انك توصل للي انت فيه ده ؟ بكل ما فيه ؟ طيب نرجع لورا شوية .. انت خططت لايه ؟ وعملت ايه ؟ طيب والنتيجة كانت ايه ؟ وليه ؟ طيب وصلت لكام في المية من اللي انت كنت متوقعه ؟! أقولك ايه ........ صفر صفر كبير اوي ! لكن .. انت تريد وانا اريد والله يفعل ما يريد فعلا ... انا اتعودت اني دايما بخطط لحياتي ولمستقبلي عشان حاجة واحدة بس عشان ييجي القدر ويقولي ايوة ، تخطيطك مظبوووووووووووووط ,,,,,,,, وواقعي وزي الفل بس طظظظظظظظظظظظظظظظظظظظ انا بقا هفشكلك ده كله ، وهاجبلك عكس الدنيا دي كلها هجبلك مكان الشر اللي انت فاكره شر ... خيييييييييييير ومكان اللي انت بتتمناه وشايف فيه خير ........ اهو ده بقا مش هجبهولك وزي ما قال الشاعر العظيم " الدنيا خربانة " !! .. القدر دايما بيأتي بكل خير ... ولكن الانسان - وأنا - دائما يجهل أين الخير مـتأكد تماماً .. من كام يوم ماتت الانثى الوحيدة اللي قررت - مؤخرا - ان اوافق وان تعيش معي السمكة !! هي سمكة أنثى - على ما اعتقد - فسباحتها بتمايلها يدل كثيرا على أنوثتها وايضا لونها .. على أي حال هي - للأسف - ماتت شبعاً نعم .. للأسف شبعا الكثير من جنس البشر يموتون جوعا ، وهذه الروح تزهق شبعا !! ياللحظ ! المهم .. واضح ان من حبي ليها قررت ان اضع لها 3 حبات أكل ، مع ان الراجل بتاع السمك قالي يكفيها حباية واحدة بس وبما اني حسيت اني مهمل فيها - مع اني بحطلها الاكل بانتظام - فقررت اضع لها الاكل بزيادة شوية ، عشان تكبر بسرعة هي فعلا ملحقتش تقعد معايا كتير ، بس انا اتعلقت بيها جدا ، كفاية كل يوم وانا نازل اصبح عليها وهي كمان تجري في البنورة وتباي بايلي " يعني تعملي باي باي " بديلها وكمان لما برجع بالليل بلاقيها مستنياني .. وبرضه بديلها أهو اي ونس .... واكيد تعلقي بيها بيرجع للمسافة المهولة التي قطعتها هذه المسكينة لكي تصل إلى او الى حيث مرقدها !! فـبس.. بعد حادثة السمكة دي اكتشفت حاجات كتيرة اوي ففعلا .. الواحد لما يحب حد ميحبهوش اوي خالص يعني عشان لما بيوصل لمرحلة حبه للآخر ... تأكد ان جه وقت الفراق !! اني كمان مقدرش اشيل هم " سمكة " .... ما بالك بحد تاني انا آخري أشيل هم نفسي ، وشغلي ، وحياتي ، ومستقبلي ، واي حاجة تنتهى بـ " ياء " المخاطبة ... واحسنلي ابعد عن اي كلمة تنتهي بـ " نا " الجمع دي !! .. التدوينة قابلة للتحديث ،، حتى لا ينقضي تاريخ ميلادي هباءاً !
|