|
::شمعة::
::The Real Candel::  Name::Mahmoud Hafez From::Normal, Illinois, United States I'm who lost everything to win himself View my complete profile
::Recent Lights::
::Old Lights::
::Other Candels::
::Spare::
|
الخميس، فبراير ٢٤، ٢٠١١ مواصفاتي لرئيس مصر القادم انا مش عاوز رئيس مصر القادم يبقى بس قادر انه يوفر الأكل والشرب والصحة والتعليم الجيد بس ... ده شيئ مفروغ منه ... الرئيس لازم يبقى عنده رؤية لمصر بعد 5 سنين و 10 سنين و 15 سنة تبقى رؤية واضحة كلنا نمشي على خطاها ونجني ثمارها يوم بعد يوم .. انا مش عاوز رئيس مصر يبقى كبير بحجة انه هيبقى " حكيم " زمانه وعنده خبرة إيه فايدة حد عنده 70 او 80 سنة ضيع أكتر من 40 سنة قبل ما حتى يخترعوا الكمبيوتر ويمكن عاش عمره كله مبيعرفش يعمل تشك على الميل بتاعه بنفسه .. ده لو عنده ميل أصلا .. رئيس مصر القادم لازم يبقى عنده فيس بوك ويعرف يعمل ايفنتس وجروبس وشير وليك ويقدر يجيب المعلومة المفيدة من بق الاسد عشان يفيد بيها بلده .... وعاوز اسمع مرة انه رد على نوت بتاعة شاب او في بلوج او استدعى حد عشان يقابله بسبب فكرة حلوة نشرها وهو قراها بالصدفة .. رئيس مصر القادم لازم في يوم من الايام اشوفه وسطنا .. سواء في جامعة او شغل او حتى في الشارع او في المترو ... او حتى في اشارة مرور ... مش يبقى في اماكن مقفولة محدش يدخلها غير لما يتفتش داخليا هو وعيلته اللي قاعدة في بيتهم !! .. مش عاوز رئيس مصر القادم يبقى مجرد صورة موجودة على الحيطة في مكان ... واسمه بيطلع لي في كل حتة زي عفريت العلبة ... عاوز اشوفه في كرامة المصري لما الاقي موظف حوازات بيحترمني في اي مطار في العالم ... لما الاقي صاحب شغلي بيحترمني في اي مكان في العالم ... .. عاوز رئيس مصر القادم يبقى راجل .. له شخصية ورأي وكريزما عالميا ... ميبقاش دلول ... عاوز أحس ان اي قرار بياخده بيعبر عني وعن اي حد في الشارع .. عاوز رئيس مصر القادم يخطب في اماكن عامة .. زي ميدان التحرير .. ويبقى متأكد ان كل الناس بتحبه وهتحميه ن وميبقاش خايف من حد كان اعتقل او عذب في عهده ... او حد له عنده تار عشان قتل ابنه او اخوه او ابوه !! عاوز رئيس مصر القادم يبقى عنده إيميل .. عشان لما يضيق بيا الدنيا ومقدرش اوصل لحل من فساد او ظلم وقع عليا ابعتله ... واجي تاني يوم الاقي حد رادد عليا .. عاوز الرئيس لما يتكلم عم عبده البواب يفهمه زيوه زي بشمهندس حسن او دكتور ابراهيم او استاذة نبيلة او ست أم محمد اللي بتحب ترغي على البصطة مع الجيران .. عاوز رئيس الجمهورية يبقى عارف انه موظف عندنا هنكرمه ونحطه فوق راسنا لو بيتقن شغله وهنشيله ونجيب غيره لو فكر يستخف بعقلنا او يعالمنا بكبر وكأنه الحاكم بأمر الله .. عاوز رئيس الجمهورية يبقى رمز وقدوة لينا ولأولادنا ... ميبقاش حواليه شبهات مهما كانت هي إيه عاوز الرئيس يبقى عارف انه بيحكم بني آدميين ... بيحكم شعب قاد التاريخ في يوم من الايام ...يبقى عارف انه بيحكم بلد كانت بتأكل العالم في يوم من الايام ... ولغاية دلوقتي ناس كتير بتحاول تفك طلاسم عالمها المتقدم رغم ان عمره 7 آلاف سنة !! .. عاوز رئيس الجمهورية يختار احسن ما فينا عشان يبقوا وزرا .. بغض النظر عن اتجاهاتهم او ارتياحه النفسي .. المهم يختار اللي يشوف انه وطني وهيقدر يفيد البلد ويقدر يساعده انه يسطر سطور وصفحات في تاريخ بلد عظيمة زي بلدنا دي .. عاوز اسمع ان رئيس الجمهورية شال الوزير الفلاني ... او المحافظ العلاني .. عشان استخدم سلطته في انه يشيل مخالفة مرور ابن عمه ... ولا عشان اتورط في عمل ضر بالبلد ... أو حتى كان سبب مباشر او غير مباشر في ضرر ولا مواطن مصري !! .. عاوز رئيس مصري يخلي كلمة " مواطن مصري" تبقى كلمة ذهبية ... لما اي حد يسمعها في اي حتة في العالم يحترمها ويقدرها .... " كان بيحزني أوي لما ادخل مطار القاهرة والاقي اهتمام رهيييييب بالاجانب والمصريين في المؤخرة .... في حين ان في نيويورك لاقينا لافتة ان المواطنين الامريكان عليهم الخروج من الباب ده وكان الاهتمام بيهم أعلى بكتير .. ولما حد كان بيتخانق مع ظابط او حاجة يقوله أنا مواطن أمريكي وليا حقوق ... بجد مش حتة من فيلم أحمد حلمي !! " .. .... بدون الدخول في كلام سياسي مجعلص وفراغ دستوري وفضاء قانوني فياتري اللي بطلبه ده صعب ؟ او مستحيل ؟ .. 
 السبت، فبراير ١٢، ٢٠١١ شكر واجب يا مصر !!  شكرا شباب مصر ... شباب ثورة 25 يناير انتو الشباب .. انتو النواة اللي بدأت ده كله ... انتو اللي بدأتوا بفكرة عبقرية على الفيس بوك .... انتو الشباب ياما اتقال عليه فاشل و"سيس " ودلوقتي كله آمن ان انتو الروح اللي رجعت لكل الشعب المصري ... منظركم اللي يفرح في جامعة الدول وشبرا وفي كل مصر .. واصراركم على دخول التحرير .. ووقوفكم في وش جبروت الشرطة ... في وش القنابل والرصاص المطاطي والحي ..... هو اللي بث الشجاعة في كل الناس وخلاهم ينضموا ليكم ... الـ 50 - 60 الف اللي كانوا في ميدان التحرير يوم التلات 25 يناير بالليل بيجروا من طلقات وقنابل الشرطة يوم خمسة وعشرين بعد منتصف الليل .... هما اللي جمعوا نفسهم تاني بدون خوف وبقوا ملايين وملايين في التحرير وفي كل حتة في مصر ... خليتوا مصر كلها بكل فئاتها .. تتكلم في السياسة والحق والعدالة الاجتماعة ... خليتوا السواق والبواب والمهندس والدكتور يتكلم على الدستور والريس وصلاحياته .... انتو اللي ابهرتوا مصر والعالم .... انتوا اللي اسقطوا النظام بجبروته وهيئاته ووزاراته واعلامه .... و انتو المستقبل اللي هتنضفوا مصر من كل خراب كان وتصلحوا كل فساد ... وانتوا اللي هتخلوا البلد دي جنة بايديكم وبروحكم اللي هي روح مصر
شكرا خالد سعيد .. بموتك حسستنا انك قريب مننا اوي .. ان الظلم قريب اوي من اي واحد فينا .. يمكن عشان انت شبهنا اوي وممكن كنت انت تبقي اي حد فينا ... صحيت فينا الرغبة في الانتقام ليك .. للحق .. مستحيل ما يقرب من 700000 بني آدم يقول كلنا خالد سعيد على الفيس بوك ... وغيرهم كتير في الشوارع في مصر والعالم تعاطف مع شخصيتك .. عمر ده كله ما يكون هباءا ... اكيد انت انسان تستحق ده وربنا جعلك سبب لتجميع شباب كتير تحت اسمك ... بسببك سحقنا شرطة بوزيرها وقوادها وظبطها
وامنها المركزي ... افرح يا خالد اسمك دخل التاريخ والاهم حبك دخل قلوب ملايين المصريين ... ان شاء الله في جنة الخلد
شكرا وائل غنيم ... محدش ينكر " والتاريخ عمره ما هينكر رغم نفسنة المنفسنين " انك كنت شرارة حق حركت واثرت في شباب كتير ... كنت حلقة وصل جمعت كل الشباب ... كنت الحلقة المفقودة ... الرجل الخفي اللي ليه مبدأ من غير ما يكون وراه مصلحة ... اللي عرض نفسه للخطر ... للتعذيب ... للأعتقال .. للسحل وضياع مستقبله عشان مبدأ آمن بيه وحط حياته كلها في ريسك عشانه .... وائل : لو انت عميل فانت اجدع عميل في العالم ... واجدع أجندة :)) شكرا البرادعي ... اتحملت كتير .. واتهمت بأنك عميل واتخونت والكلام طال سمعتك وسمعة عيلتك بسبب مبدأ برضه أمنت بيه ...انا مصدق جدا انك كنت أمين جدا ولم تعطي الشرعية لأمريكا لتغزو العراق وتقريراتك كانت واضحة بعدم وجود اسلحة دمار شامل في العراق ... واعطيت نوبل في السلام عن استحقاق ... شكرا لأنك حطيت نفسك قدام شلة عصابة وطاغية عمره 30 سنة سلطة ... شكرا لأنك لابيت طلب الشباب والناس اللي كانت بتناديك .. في حين ان نفس الشباب نادت اسماء كتير عشان تقف قدام النظام وهما معاهم الاسماء دي اختارت طريق السلامة " امثال عمرو موسى والجنزوري " بغض النظر عن النوايا ، وشكوك الاجندات والعمالة وركوب الموجة اللي زرعتها فينا النظام وبقايا واكيد كل الناس تاثرت نوعا ما باشاعات النظام حتى لو كنا دايما مقتنعين بيه .. بغض النظر عن ده كله فانا احيك على وطنيتك ولو كنت سترشح نفسك للرئاسة فلتدع الصندوق الانتخابي يحكم
شكرا عصابة مبارك ... شكرا لكل اقذار الوطن اللي جمعوا الشعب ده على كلمة واحدة .. جمعوا الشباب على حب الوطن بطريقة غير مباشرة ... على الشحن السلبي لسنوات كتيرة ... لعمر شباب .. ليتحول بقدرة قادر لطاقة نور ايجابية تجعل الطبيب يكنس شوارع مصر حبا ! ..... شكرا عصابة مبارك لانكم زدتم ايماننا بالله ان الحق لابد ان ينتصر وان الباطل لابد وان يدهس تحت اقدام اصحاب الحقوق .. عاجلا أم آجلا
شكرا مارك زوكربرج " عمري ما بعرف انطق الاسم الاخير بتاعه " ... يمكن عمر خيالك ما هيجيبك ان موقعك اللي اسسته عشان الشباب يظبطوا بعضشيهم ... انه يكون سبب غير مباشر في ثورة حقيقية على أرض اعظم بلد في العالم
شكرا شباب 6 ابريل .... كنتوا ومازلتوا صوت الشباب على ارض الواقع اللي طالب بحقوقه في المشاركة في الحياة السياسية ... لعبتوا دور كبير اوي في الثورة وقبلها ... يمكن قابلت منكم شباب يوم 25 وما بعدها ... بس حتى معرفش اساميهم ... بس فعلا شباب زي الورد و دماغكم حلوة اوي واكيد هتتوظف كتيير في الخير اللي جاي لمصر ... لمستقبل مصر
شكرا الاخوان المسلمين ... تعرضكم للظلم على مدار السنوات .. بغض النظر عن ميولكم السياسية " اللي هي حق كل مواطن مهما كانت انتمائاته " ... إلا انكم واجهتم كل الظلم والتعذيب والتشهير والتخوين ، ورغم الانقسامات الداخلية إلا انكم مازلتم متماسكين كاكثر قوة سياسية معارضة للنظام منظمة وقوية ولها وزن سياسي على مستوى مصر ... غير انكم اكتر ناس محتكين بالشعب والطبقات المختلفة بجد بدون الدخول في النوايا ... اعمالكم تدل على وطنيتكم ...والايام القادمة سوف تثبت الكثير ... فكونوا عند حسن ظن الوطن ... وخيبوا آمال المفترون عليكم بوجود اجندات اجنبية وترتيبات داخلية واطماع سياسية .. فانا ومثلي كثيرون يحسن الظن بكم
شكرا ايها الاخوة المغيبيين ... كنتوا تحدي لينا كلنا في كل حتة .. نتخانق في الشارع والمواصلات عشان نحاول نوضح ونشيل غمامة الاعلام المصري ... يا ريت كلنا نتعلم من ال 17 يوم اللي فاتوا دول
شكرا لكل الاخوة المسيحيين والمسلمين .. الاطفال والعجائز ... الشباب والشابات ... اللي اعتصموا في ميدان التحرير " بارت تيم او فول تيم " .... كل الناس اللي ساعدت ان الثورة دي تنجح على ارض الواقع
شكرا قناة الجزيرة : بغض النظر عن العمالة والتخوين " اللي هو الطيشة في اي حاجة ضد الحكم السابق " إلا ان التغطية الاعلامية كانت فوق الرائعة ... الحكومة تمنع البث تغيروا الترددات ... تمنع الترددات تنطوا على قنوات تانية وتعملوا دمج .. تكسرلكم المكتب وتسحب الكارنيهات وتمنع الصحفيين بتاعكم وتضربهم وتعتقلهم وبرضوا باصرار فظييييييييع تستمروا في تغطية فوق الممتازة " بالعربي وبالانجليزي" وعلى الهواء مباشرة .. وتكوني سابقة في اي مفاجأة بيعملها النظام ، لدرجة اني حسيت انك عرفتي من البلطجية انهم هيجموا قبل النظام :D
أكتر من شكر ... الى شهداء ... انتم الرجال .. سواء كنت رجال او نساء او اطفال .. كبار او صغار .. انتم الرجال .. انتم افضل ما ولدت هذا الوطن .. اذا كان هذا الوطن به شرفاء فانتم اشرفهم .. واذا كان به نبلاء فأنتم النبلاء .... ارقدوا في سلام ....فلم ولن ننسى دماءكم الحرة التي رسمت طريق حريتنا .... سنحفظ اسمائكم ونحفظها لأولادنا ... سنسمي بها شوارعنا ومدارسنا ومحطات المترو ... سيحكي التاريخ عن 400 بطل اضاءوا طريق الحرية واحرقوا قلب حاكم ودولة وكيان طاغي بصدورهم واروحاهم .... هنيئا لكم الجنة بإذن الله ... يا أطهر ما أنبتت هذه الارض السمراء!
شكرا مصر : شهر قبل الآن كنت تمتلكني فكرة الندم اني رجعت من امريكا ، راودتني افكار شيطانية اني كان افضل ليا اني اعيش في بلاد العم سام حتى لو " غير قانونيا" خير لي من العيش تحت حكم ذل وقهر وبلد يغتصب فيها الحقوق " عيني عينك " وممكن في لحظة الواحد يلاقي نفسه مولع في قطر او اشلاء في دور عبادة او متعلق ومتكهرب في قسم او غرقان في سفينة او طالع عليه مجنون في قطر بمسدس ميري او حتى مضروب على قفاه من غير ما ياخد حقه ... ويموت " فطيس " .. بس دلوقتي .. بفضل شبابك وبفضل شعب الحر ... احنا احرار ....احرار بجد !! مصر ... انتي رفعتي راسنا تاني لفوق اوي .... خليتي كل الشعب المصري جوة مصر وفي ميع انحاء العالم يقول بأعلى صوته .... أنا مصري وأفتخر .... المصريين في اسبوعيين بقوا مصدر إلهام العالم كله مصر مش بس اهرامات ونيل وابو الهول ...مصر هي ناس ... بشر .... احرار !!
مصر ..... يا اعظم و أجمل بلد في العالم ... والله العظيم بحبك
الأربعاء، فبراير ٠٩، ٢٠١١ الناس اللي في التحرير !  الناس اللي في التحرير هما اللي دهسوا حلم التوريث تحت رجليهم ... هما اللي عينوا نائب للريس .... وهما اللي خلوا الريس يطلع ويقول هارجع في كلامي واغير مواد الدستور " اللي غيرها قبل كدة لصالحه ولصالح ابنه " ..الناس اللي في التحرير هما اللي هزوا عرش مصر اللي كان بيتبني من 30 سنة ع الظلم... الناس اللي في التحرير خلت مصر كلها تتكلم في السياسة وتشتري جرايد اكتر وتبدأ تبص على مواد الدستور ... ده كله في ايام في حين ان الناس كانت بتنده في مالطة بقالها سنيين عشان ده يحصل ومكناش نحلم انه يحصل ! الناس اللي في التحرير هما اللي غيروا وزارة رجالة الاعمال وشالوا أحمد عز وقيادات الوطني اللي كانوا طابقين على نفسنا من سنين ومش قادرين نفتح بقنا .... الناس اللي في التحرير هما اول ناس يقولوا لمصر وللشرطة لأ ... ستوب ... في حاجة اسمها كرامة منقبلش حد يقرب لها .... الناس اللي في التحرير خلت مصر كلها تبدأ تدور ع العدالة الاجتماعية الناس اللي في التحرير هما اللي مخليين الحكومة متكهربة وعمالة تنزل في جرايدها الرسمية انها هاترفع الاجور وهتعمل مزيد من الحريات ... وهتغير مواد الدستور اللي عمر ما كان يقدر بس يفكر انه يقربلها الناس اللي في التحرير هما اللي شالوا الظالم العادلي اللي طابق على نفسنا من سنيين وظلم وعذب وقهر ناس كتيييير ... شالوا وزير الداخلية في حين انك مكنتش تقدر حتى تشتكي أمين شرطة الناس اللي في التحرير هما اللي كسروا الخوف جوة الشعب المصري وبعد ما كان كلوا بيقول سياسة لأ ... دلوقتي تلاقي كل الناس بتقول رايها بصوت عالي في المترو والمواصلات العامة الناس اللي في التحرير هي السبب في ان ملفات فساد كتيرة بدات تفتح ... ووزرا اتحفظوا على ممتلكاتهم ... ووزرا تانيين محبوسين في بيتهم زي الفيران بعد ما كنا بننتظرهم في الشوارع لغاية ما يمروا سيادتهم ونبص على العربيات المفيمة ونتحسر على مستقابلنا الناس اللي في التحرير هما أول ناس بدأوا شعار " حرية ... كرامة ... عدالة اجتماعية " ... الناس اللي في التحرير هما اللي بيغيروا مصر بجد .. غصب عن اي حد مهما كانت قوته وظلمه وبطشه ... ومهما كان غبيومش فاهم ومنساق ورا اعلام مزيف الناس اللي في التحرير هما اللي حموا المتحف المصري لما كان معرض للحرق والسرق والنهب ....وهما اللي بيدافعوا ان اي حاجة ممكن تمس "مصر" في اي وقت ولو بكلمة الناس اللي في التحرير هي اللي قاعدة ومستحملة .. مطر وبرد وشمس ونايمة ع الرصيف ومعرضة نفسها للخطر ... عشان غصب عن اي حد تجيب حقها وحق كل المصريين من كرامة وعز .. وفك قيد الذل والمهانة .... حتى غصب عن الناس اللي عاوزة تعييش فيه الناس اللي في التحرير آباء وامهات واخوات ناس اتدهسوا من عربيات الشرطة.. اتسحلوا ... جالهم عاهات مستديمة اتضرب عليهم رصاص مطاطي وحي وقنابل واستشهدوا في سبيل مصر .... في سبيل انهم يقولوا كلمة حق عند سلطان جائر ... في سبيل حريتنا وكرامتنا الناس اللي في التحرير هما اللي بيصنعوا التاريخ .. تحت .. في الشارع ... وسط مئات المعوقات ... مش قاعدين تحت البطاطين مدفيين وبيعملوا فيها محللين سياسيين ... الناس اللي في التحرير بيصنعوا التاريخ .. مش بيتفرجوا عليه في التليفزيون او يقروه في ا...لجرايد الناس اللي في النحرير اثبتت لمصر .. وللعالم كله .. اننا نقدر بنفسنا .. ممكن نغير ... على الرغم ان لسة في فئة مش مصدقة ده وبتنسبه لجهات اجنبيه واجندات ووجبات كنتاكي !! .. ياترى بقا الناس اللي قاعدين في بيتهم بيتهموهم بالعمالة لكل قوى الشر في العالم " ايران امريكا اسرائيل افغانستان " ... وكأن كل قوى العالم اتحدت على حاجة واحدة دلوقتي ط وهش توزيع اجندات في ميدان التحرير مع كل وجبة كنتاكي " ! ياترى بقا الناس دي ... الناس اللي قاعدة في بيتهم بيشككوا اكتر ناس وطنيين في مصر في وطنيتهم .... عملوا ايه في البلد ... عملوا ايه طول الفترة اللي فاتت دي كلها غير انهم قاعدين ساكتين متهانيين من غير راي ورايحيين مع الجايين وراجعين مع الراجعين واكتر مبدأ هما متمسكين بيه اللي نعرفه احسن من اللي منعرفهوش ؟!
يا رب نفهم بقا ونصحى من غيبوبة الاعلام المصري دي بقا !
الأحد، فبراير ٠٦، ٢٠١١ كله إلا الشرف  بعد أن انتهت ثورة الضباط الأحرار عام 1952 بنجاح، ظهرت دعاوى كثيرة، تهاجم الثورة وأسبابها وما وصلت إليه، وتتهمها بأنها أرجعت مصر سنوات للوراء، وان الضباط الأحرار هم من نهب وسرق السرايات وثروات البشوات، ورغم سذاجة هذه الأكاذيب، إلا أنها وجدت من يصدقها، مثلما حدث مع شباب التحرير، أصحاب ثورة الغضب 25 يناير.. وكأن هذا هو مصير كل الثورات النبيلة في حياة المصريين !!. الفرق بين الهجوم الذي تعرضت له ثورة 1952، وثورة شباب التحرير، أن الأولي ظهرت الاتهامات فيها بعد أن مات أغلب من قام بها.. بينما الثانية، ظهرت الاتهامات سابقة التجهيز معلبة، قبل حتى أن تنتهي، وبصورة أكثر قسوة ودناءة، وللأسف وجدت أكاذيب "أعداء الثورة" أذن تسمعهم، وعقولهم تصدقهم، وبعض الألسنة تردد.. ويا لطيبة المصريين.. فعلاً استطاع النظام أن يغيب العقول، ويرسخ ثقافة "التربص والمؤامرة"، حتى بات الشعب لا يصدق انه قادر علي التغيير !! أسوء ما يمكن أن يعانيه إنسان "عنده دم".. هو أن تتهمه في سمعته وشرفه، وأسوء تهمة يمكن أن توجهها لشرف إنسان مخلص، هي خيانة الوطن، والعمالة لدولة أجنبية، وبصورة مجانية، عن جهل وعدم دراية.. أي أنهم مجموعة من الخونه والسذج.. الاتهامات انهالت، وجاءت من كل ميكروفون وشاشة وصحيفة تتبع الإعلام الحكومي وبعض أتباعه من الإعلام الخاص، فراحوا بكل همة وحماس يخوضون في شرف أنبل جيل جاء لمصر منذ سنوات بعيده.. رغم أن دماء شهداء التحرير مازالت ساخنة لم تجف بعد. اتهموهم بأنهم ينفذون أجندات أجنبية.. فتارة يقولون أنهم شباب مدفوع من إسرائيل وأمريكا، وتارة أخري حماس وحزب الله وإيران. ودائماً وابدأ الإخوان المسلمين.. بدم بارد، وبوجوه كلحة، يخوضون في سمعة هؤلاء الشباب الأشراف، الذين أعادوا لمصر كرامتها وعزتها بعد سنوات من المهانة. علي قصة الأجندات، شباب ثورة التحرير، قرروا توزيع اجندات مجانية علي كل المتظاهرين، علي أن تكون الاجندة "الكحلي" للشباب، بينما الاجندة "البمبي" للفتيات.
لا اعرف كيف طاوعتهم، قلوبهم وعقولهم.. لا أقول ضمائرهم، فاعتقد أنها منتهية الصلاحية منذ سنوات بعيدة.. صوروا الشباب الذي هزوا عرش النظام، وجعل جهاز الشرطة يختفي ويهرب أمامهم.. كأنه أداء في يد قوى خارجية.. تحركه كيفما تشاء.. كلها هذا لكي يؤكدوا لنا أن مصر "محسودة" و"مستهدفة" لزعزعة "زعازيع" الأمن والاستقرار الذي تعيشه مصر، والذي بات محل غيظ ونقم من كل دول العالم.. التي تحالفت وسخرت كل إمكانياتها، لكي تحرم المصريين من "التمرمغ" في عز وخير نظام الرئيس مبارك، هؤلاء الحقدة أرادوا، أن تزول من أمام أعيننا النعمة، فدبروا ثورة مستوردة، علي أيدي شباب من الغر السذج "بتوع فيس بوء".
غبائهم، جعلهم يوزعون اتهاماتهم "الهبلة" على الثوار دون حتى حبكة ومجهود في التأليف، ليكشف غبائهم أكاذيبهم.. والتي كشفت عن جهل شديد، واستغراق في غيبوبة عصور الجمال والحمير.. فجاءت أكاذيبهم مرسلة، وساذجة، وخالية من دليل واحد، فمرة يقولون، أن هناك أجانب كثيرون يشاركون في المظاهرات، ونكتشف بعد ذلك أنهم صحفيون، ثم يعودوا ليقولون، هناك أموال أجنبية توزع علي المتظاهرين، ووجبات كنتاكي من الإخوان !! فردت عليهم مظاهرات شارك فيها 2 مليون مصري في جمعة الرحيل في ميدان التحرير فقط.. بالطبع جميعهم كانوا قابضين أموال.. وامتلاءات بطونهم بوجبات فاخر مستورة، مكونة من بقسماط فيلية.. وفول بالمشروم.. وكشري بالسيمون فيمية .. اما " درنكز" فجاءت من افخر أنواع المياه "المحنفنة". سذاجة كذبهم العاري الاهطل.. جعلت احد الشباب يعلق ويقول، لو قالوا إن الإخوان بيجبولنا أكل من "مؤمن" كانت الكلام بقى واقعي".، ويضيف :" هنعمل ايه تأني فيهم.. حتى الكذب هنعلمهولهم". صبراً جميلاً يا كذابين الزفة.. أيها الأفاقين، الراقصين علي جسد النظام البائد.. حسابكم سيأتي.. سواء كنتم، إعلاميين، أو فنانين، أو مدعي ثقافة وعلم، وقريبا جداً إن شاء الله سنزفكم لمزبلة التاريخ، مقر ومستقر أمثالكم.. ويكفي إنكم من ألان فقدتم أي احترام، حني بينكم وبين أنفسكم.. لأنكم بعتم أنفسكم، لنظام قاتل، وأدرتم ظهوركم لوطن عزيزاً خالداً.. واستكثروا علي الشعب المصري أن يحصل علي استقلاله ويبني مستقبله ويتحكم في مصيره، بفضل شباب حر واعي.. شباب لم يلوثه نظام فاسد، ولا أحزاب كارتونية ضعيفة. هؤلاء الشباب، أعطوا مصر كلها درساً في الكرامة، وعلموا الأحزاب، كيف يكون التفاوض، وعلموا الإعلام الحكومي، كيف يكون الصوت العالي، إلي سمعته كل دول العالم وانحت له إعجابا واحتراماً، وأصبحوا قدوة لإبائهم، وأراحوا أجداهم في قبورهم.. بعد أن اطمئنوا.. أن في مصر رجال انتزع الحلم، وزرع الأمل بين الصخور.. ولقنوا كل متجبر ظالم درساًَ قاسياً..مفاده أن الشعب المصري هو الأقوى، والأبقى.. لأنه أراد الحياة فكان يجب "غصب عنه" أن يستجيب القدر. .. بقلم- خالد البرماوي: من موقع مصراوي
|